ជនស៊ីវិលរាប់សែននាក់នៅតំបន់ហ្កាហ្សា កំពុងប្រឈមនឹងស្ថានភាពកាន់តែអាក្រក់ទៅៗ នៅពេលរលកកម្តៅគ្របដណ្ដប់តំបន់ដ៏តូចចង្អៀតមួយនេះ ដែលធ្វើឱ្យកិច្ចការជាមូលដ្ឋានដូចជាការស្វែងរកស្បៀងអាហារ និងទឹកផឹក ស្ទើរតែមិនអាចទៅរួច។ ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយកាលពីថ្ងៃសៅរ៍ (៩ សីហា) ថា អ្នកស្រុកប៉ាឡេស្ទីនកំពុងជួបទុក្ខវេទនាកាន់តែធ្ងន់ធ្ងរ ដូចជាអរិភាព ការត់ជម្លៀសខ្លួន ភាពអត់ឃ្លានធ្ងន់ធ្ងរ និងការបំផ្លិចបំផ្លាញទ្រង់ទ្រាយធំមិនធ្លាប់មាន។
លើសពីនេះ ជំនួយដែលចូលទៅហ្កាហ្សា នៅតែទាបជាងអ្វីដែលត្រូវការ ហើយបេសកកម្មជំនួយនៅតែបន្តប្រឈមនឹងការពន្យារពេល។ នៅតំបន់ហ្កាហ្សាភាគខាងត្បូង ដៃគូមនុស្សធម៌នានារបស់កាលរិយាល័យ OCHA បានរាយការណ៍ពីការខូចខាតដល់បណ្ដាញអគ្គិសនី ដែលបម្រើដល់រោងចក្របម្លែងទឹកសមុទ្រជាទឹកសាបសម្រាប់ប្រើប្រាស់ ស្របពេលវិបត្តិទឹកយ៉ាងគ្រោះថ្នាក់។
ក្រៅទុក្ខលំបាកផ្នែកអាកាសធាតុ OCHA ក៏សង្កត់ធ្ងន់ថា ការទម្លាក់ជំនួយពីលើអាកាសនៅទូទាំងតំបន់ហ្កាហ្សា ត្រូវរាយការណ៍ថាបានបណ្តាលឱ្យជនស៊ីវិលស្លាប់កាន់តែច្រើន។ ជាមួយគ្នានេះ កាលពីថ្ងៃសុក្រ អគ្គលេខាធិការអង្គការសហប្រជាជាតិ លោក Antonio Guterres បានចេញការព្រមានចំពោះការសម្រេចចិត្តរបស់អ៊ីស្រាអែល ក្នុងការគ្រប់គ្រងទីក្រុងហ្កាហ្សា។
លោក Guterres ព្រមានថា ការសម្រេចចិត្តនេះអាចនាំឱ្យមានការភៀសខ្លួន ការស្លាប់ និងការបំផ្លិចបំផ្លាញកាន់តែមហន្តរាយថែមទៀត ដែលធ្វើឱ្យប្រជាជនហ្កាហ្សា រងទុក្ខវេទនាឥតស្រាកស្រាន្ត៕