មនុស្សមួយចំនួនត្រូវបានចាប់ខ្លួននៅក្នុងការតវ៉ាយ៉ាងតានតឹងខាងក្រៅសណ្ឋាគារ Britannia ក្នុងប្លុកអគារ Canary Wharf របស់ទីក្រុងឡុងដ្រ៍ ហើយក្រុមបាតុករពីរក្រុមបានប្រមូលផ្តុំគ្នានៅក្នុងទីក្រុង Dorset កាលពីថ្ងៃសៅរ៍ (៩ សីហា) ដើម្បីបញ្ចេញមតិប្រឆាំងនឹងជនអន្តោប្រវេសន៍ ខណៈបាតុកម្មទាំងប្រឆាំង និងគាំទ្រជនអន្តោប្រវេសន៍ បានផ្ទុះឡើងនៅជិតសណ្ឋាគារនានាដែលដាក់អ្នកស្វែងរកសិទ្ធិជ្រកកោន ទូទាំងចក្រភពអង់គ្លេស។

ទីប្រជុំជន Bournemouth បានមើលឃើញមនុស្សម្នារាប់រយនាក់ចេញតវ៉ានៅលើផ្លូវ Meyrick ដែលត្រូវបានបិទបណ្ដោះអាសន្នដើម្បីសុវត្ថិភាព។ នគរបាលកុបកម្មបានរុញច្រានយ៉ាងតានតឹងរយៈពេលខ្លីនៅទីនោះជាមួយអ្នកចូលរួមការតវ៉ាប្រឆាំងជនអន្តោប្រវេសន៍។ ក្រៅការប្រឆាំង ចក្រភពអង់គ្លេសក៏បានមើលឃើញហ្វូងមនុស្សរាប់រយនាក់ចេញតវ៉ាគាំទ្រជនអន្តោប្រវេសន៍ ជាមួយឃ្លាតវ៉ា "ប្រឆាំងការរើសអើងពូជសាសន៍" នៅតំបន់ Canary Wharf ដែលជាផ្នែកមួយនៃបាតុកម្ម "ការពារជនភៀសខ្លួន បញ្ឈប់ពួកស្ដាំនិយមជ្រុល"។

ភាពតានតឹងនៅទូទាំងចក្រភពអង់គ្លេសនេះបានកើតឡើងនៅពេលដែលនគរបាលក្រុងនានាត្រៀមទប់ទល់បាតុកម្មចុងសប្តាហ៍ដ៏មមាញឹក រួមទាំងការតវ៉ាដែលបានគ្រោងជាច្រើនដែលអាចកើតមាននៅខាងក្រៅសណ្ឋាគារ Britannia មួយផ្សេងទៀតនៅថ្ងៃអាទិត្យ (១០ សីហា) នេះ៕