សារព័ត៌មាន Sydney Morning Herald ហៅកាត់ថា SMH បានរាយការណ៍ថា អូស្ត្រាលី មានគម្រោងទទួលស្គាល់រដ្ឋប៉ាឡេស្ទីនមួយក្នុងពេលឆាប់ៗ ដែលលឿនបំផុតគឺថ្ងៃចន្ទ (១១ សីហា) នេះ បន្ទាប់ពីវិធានការស្រដៀងគ្នាដោយបារាំង អង់គ្លេស និងកាណាដា។ SMH រាយការណ៍ដោយដកស្រង់ប្រភពមិនបញ្ចេញឈ្មោះថា លោកនាយករដ្ឋមន្ត្រីអូស្រា្តលី Anthony Albanese អាចចុះហត្ថលេខាលើការទទួលស្គាល់នេះ បន្ទាប់ពីកិច្ចប្រជុំគណៈរដ្ឋមន្ត្រីជាប្រចាំនាថ្ងៃចន្ទដដែលនេះ។

ការិយាល័យរបស់ Albanese មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។ គួរឱ្យដឹងថា បារាំង និងកាណាដា កាលពីខែមុន បាននិយាយថា ខ្លួនគ្រោងទទួលស្គាល់រដ្ឋប៉ាឡេស្ទីន ខណៈអង់គ្លេសក៏និយាយថា ខ្លួននឹងធ្វើតាមដូចគ្នានេះ លុះត្រាតែអ៊ីស្រាអែល ដោះស្រាយវិបត្តិមនុស្សធម៌នៅដែនដីប៉ាឡេស្ទីន ហ្កាហ្សា និងឈានដល់បទឈប់បាញ់មួយ។

អ៊ីស្រាអែល បានរិះគន់ខ្លាំងៗលើការសម្រេចចិត្តរបស់បណ្តាប្រទេសទាំងនោះក្នុងការគាំទ្ររដ្ឋប៉ាឡេស្ទីន ដោយនិយាយថា ការធ្វើបែបនេះនឹងផ្តល់រង្វាន់ដល់ក្រុមហាម៉ាស ដែលជាក្រុមសកម្មប្រយុទ្ធគ្រប់គ្រងតំបន់ហ្កាហ្សា។ លោក Albanese តែងអំពាវនាវឱ្យអនុវត្តដំណោះស្រាយរដ្ឋពីរ ហើយរដ្ឋាភិបាលកណ្តាលនិយមឆ្វេងរបស់លោកក៏គាំទ្រសិទ្ធិរបស់អ៊ីស្រាអែល ក្នុងការរស់រានដោយមានព្រំដែនសុវត្ថិភាព និងសិទ្ធិរបស់ប៉ាឡេស្ទីន ក្នុងភាពជារដ្ឋរបស់ពួកគេផងដែរ៕