អនុប្រធានាធិបតីអាមេរិក លោក JD Vance បាននិយាយថា ការសម្របសម្រួលសន្តិភាពដែលចរចារវាងរុស្ស៊ី និងអ៊ុយក្រែន ទំនងជាមិនបំពេញចិត្តភាគីណាមួយបានឡើយ ហើយកិច្ចព្រមព្រៀងសន្តិភាពណាមួយ ក៏ទំនងជានឹងធ្វើឱ្យទាំងទីក្រុងមូស្គូ និងទីក្រុងគីវ មិនសប្បាយចិត្តនោះទេ។ លោកសង្កត់ធ្ងន់ថា សហរដ្ឋអាមេរិកមានបំណងសម្រេចដំណោះស្រាយមួយដែលប្រទេសទាំងពីរអាចទទួលយកបាន។

ថ្លែងនៅក្នុងកម្មវិធីពេលព្រឹកថ្ងៃអាទិត្យ (១០ សីហា) របស់ទូរទស្សន៍ Fox News លោក Vance បាននិយាយថា "ដំណោះស្រាយនឹងមិនធ្វើឱ្យនរណាម្នាក់សប្បាយចិត្តទេ។ ទាំងភាគីរុស្ស៊ី និងអ៊ុយក្រែន ប្រហែលជានៅចុងបញ្ចប់នៃថ្ងៃនោះ នឹងមិនសប្បាយចិត្តជាមួយនឹងលទ្ធផលនោះឡើយ"។

ប្រធានាធិបតីអាមេរិក លោក Donald Trump បាននិយាយនៅថ្ងៃសុក្រសប្ដាហ៍មុនថា លោកនឹងជួបជាមួយសមភាគីរុស្ស៊ី លោក Vladimir Putin នៅថ្ងៃទី ១៥ ខែសីហា ខាងមុខនេះ ក្នុងរដ្ឋអាឡាស្កា ដើម្បីចរចាបញ្ចប់សង្រ្គាមនៅអ៊ុយក្រែន។ លោក Trump និយាយថា រុស្ស៊ី និងអ៊ុយក្រែនខិតជិតដល់កិច្ចព្រមព្រៀងឈប់បាញ់មួយហើយ ដែលអាចបញ្ចប់ជម្លោះរយៈពេល ៣ឆ្នាំកន្លះមកនេះ ដោយនោះប្រហែលជាតម្រូវឱ្យអ៊ុយក្រែន ប្រគល់ទឹកដីសំខាន់ៗមួយចំនួន។

យ៉ាងណាក៏ដោយ បន្ទាប់ពីការបង្ហើបនេះ ប្រធានាធិបតីអ៊ុយក្រែន លោក Volodymyr Zelenskiy បានប្ដេជ្ញាកាលពីថ្ងៃសៅរ៍ចុងសប្ដាហ៍ថា អ៊ុយក្រែនមិនអាចរំលោភរដ្ឋធម្មនុញ្ញរបស់ខ្លួនលើបញ្ហាទឹកដីបានទេ ដោយបន្ថែមថា "ប្រជាជនអ៊ុយក្រែន នឹងមិនប្រគល់ទឹកដីរបស់ពួកគេទៅឱ្យពួកកាន់កាប់ជាដាច់ខាត"៕