អាជ្ញាធរនិយាយថា ការបាញ់ប្រហារទ្រង់ទ្រាយធំមួយបានកើតឡើងនៅឯក្លឹបរាត្រីមួយកន្លែងក្នុងប្រទេសអេក្វាឌ័រ កាលពីថ្ងៃអាទិត្យ (១០ សីហា) បណ្ដាលឱ្យមនុស្ស ៨នាក់ស្លាប់ និង ៣នាក់ផ្សេងទៀតរងរបួស នៅក្នុងឧប្បត្តិហេតុដ៏កម្រោលចុងក្រោយបំផុត ដែលបានវាយប្រហារប្រទេសនៅអាមេរិកខាងត្បូងមួយនេះ។

ការបាញ់ប្រហារនេះកើតឡើងនៅតំបន់ជនបទនៃទីក្រុង Santa Lucía ក្នុងខេត្តឆ្នេរសមុទ្រ Guayas ដែលចាត់ទុកថាជាតំបន់គ្រោះថ្នាក់បំផុតមួយរបស់អេក្វាឌ័រ។ យោងតាមសេចក្តីថ្លែងការណ៍របស់នគរបាលបានឱ្យដឹងថា ជនរងគ្រោះ ៧នាក់ អាយុចន្លោះពី ២០ ទៅ ៤០ឆ្នាំ បានស្លាប់នៅក្នុងក្លឹប ចំណែកការស្លាប់ទី៨ កើតឡើងនៅមន្ទីរពេទ្យ។

សមត្ថកិច្ចបានឱ្យដឹងថា ជនសង្ស័យជាច្រើននាក់មានអាវុធធុនធ្ងន់ បានសម្រុកទៅក្លឹបរាត្រីនោះដោយជិះម៉ូតូ និងរថយន្ត ២គ្រឿង ហើយគេមិនទាន់ដឹងឡើយថា មូលហេតុអ្វីដែលបណ្ដាលឱ្យមានការបាញ់ប្រហារសម្លាប់រង្គាលនេះ។ គួរឱ្យដឹងថា មនុស្សរាប់សិបនាក់ត្រូវបានសម្លាប់ក្នុងប៉ុន្មានខែថ្មីៗ ដែលភាគច្រើននៅក្នុងខេត្តឆ្នេរសមុទ្រចំនួន៤ របស់អេក្វាឌ័រគឺខេត្ត El Oro, Guayas, Manabí និង Los Ríos ហើយខេត្តទាំងអស់នេះកំពុងស្ថិតក្នុងស្ថានភាពអាសន្ន។

ការសម្លាប់រង្គាលបែបនេះ និងឧប្បត្តិហេតុហិង្សាដ៏បង្ហូរឈាមជាច្រើនបានរួមរឹតអាជ្ញាធរ និងមន្ត្រីក្នុងប្រទេសអេក្វាឌ័រ ចាប់តាំងពីឆ្នាំ២០២៣មក នៅពេលដែលប្រទេសនេះបានជួបប្រទះនូវអំពើហិង្សាដែលមិនធ្លាប់មានពីមុន៕