តម្លៃប្រេងបានធ្លាក់ចុះក្នុងការជួញដូរពេលព្រឹកព្រលឹមក្នុងតំបន់អាស៊ី នៅថ្ងៃចន្ទ (១១ សីហា) នេះដោយបានបន្តការធ្លាក់ចុះជាង ៤% កាលពីសប្តាហ៍មុន ដោយសារការដំឡើងពន្ធខ្ពស់របស់អាមេរិកលើដៃគូពាណិជ្ជកម្មរបស់ខ្លួន ការដំឡើងទិន្នផលប្រេងពី OPEC និងជាពិសេសទៅលើការរំពឹងទុករបស់ទីផ្សារសកលថា អាមេរិក និងរុស្ស៊ី កំពុងខិតទៅជិតកិច្ចព្រមព្រៀងបទឈប់បាញ់នៅអ៊ុយក្រែន។

ភាគហ៊ុនប្រេងឆៅរបស់ Brent បានធ្លាក់ចុះ ៥២សេន ឬ ០,៧៨% មកនៅត្រឹម ៦៦,០៧ដុល្លារក្នុងមួយបារ៉ែល គិតត្រឹមម៉ោងសកល ០០:៤១នាទី រំលងអាធ្រាត្រឈានចូលថ្ងៃចន្ទនេះ ខណៈហ៊ុនប្រេងឆៅរបស់អាមេរិក WTI បានធ្លាក់ចុះ ៥៨សេន មកនៅត្រឹម ៦៣,៣០ដុល្លារ។

ការរំពឹងទុកបានកើនឡើងសម្រាប់លទ្ធភាពនៃការបញ្ចប់ទណ្ឌកម្មដែលគាបសង្កត់ការផ្គត់ផ្គង់ប្រេងរបស់រុស្ស៊ី ទៅកាន់ទីផ្សារអន្តរជាតិ បន្ទាប់ពីប្រធានាធិបតីអាមេរិក លោក Donald Trump បានប្រកាសកាលពីថ្ងៃសុក្រសប្ដាហ៍មុនថាលោកនឹងជួបជាមួយប្រធានាធិបតីរុស្ស៊ី លោក Vladimir Putin នៅថ្ងៃទី ១៥ ខែសីហា នៅរដ្ឋអាឡាស្កា ដើម្បីចរចាបញ្ចប់សង្រ្គាមនៅអ៊ុយក្រែន។

ដំណឹងនេះបានកើតឡើងខណៈដែលអាមេរិក បានបង្កើនសម្ពាធលើរុស្ស៊ី ដោយបង្កើនការរំពឹងទុកថា ការដាក់ទណ្ឌកម្មលើក្រុងមូស្គូ ក៏អាចត្រូវបានរឹតបន្តឹងផងដែរ ប្រសិនបើកិច្ចព្រមព្រៀងសន្តិភាពមិនត្រូវបានសម្រេច៕