យោធាអ៊ុយក្រែន បាននិយាយថា ខ្លួនបានវាយប្រហារលើរោងចក្រចម្រាញ់ប្រេងក្នុងតំបន់ Saratov របស់រុស្ស៊ី ក្នុងការវាយប្រហារដោយយានដ្រូនកាលពីពេលយប់ បណ្តាលឱ្យមានការផ្ទុះនិងការបំផ្លិចបំផ្លាញ ខណៈការវាយប្រហារតាមអាកាសរាល់ថ្ងៃទៅវិញទៅមកកាន់តែខ្លាំងឡើងក្នុងពេលមានការជំរុញផ្នែកការទូតដើម្បីបញ្ចប់សង្រ្គាម។

អភិបាលតំបន់ Saratov បាននិយាយកាលពីថ្ងៃអាទិត្យថា មនុស្សម្នាក់ត្រូវបានសម្លាប់ ហើយអគារលំនៅឋានជាច្រើនកន្លែងនិងអគារឧស្សាហកម្មមួយកន្លែងបានខូចខាត ប៉ុន្តែពុំបាននិយាយពីរោងចក្រចម្រាញ់ប្រេងដែលត្រូវបានវាយប្រហារនោះទេ។

លោក Osama Bin Javaid អ្នកសារព័ត៌មានAl Jazeera បាននិយាយដោយរាយការណ៍ពីទីក្រុងមូស្គូថា «យានដ្រូនអ៊ុយក្រែន កំពុងកំណត់គោលដៅចូលកាន់តែជ្រៅទៅក្នុងទឹកដីរបស់រុស្ស៊ីជាងកាលពីពេលកន្លងទៅ នៅកន្លែងដែលការវាយប្រហារកាលពីពេលមុនត្រូវបានផ្តោតសំខាន់ទៅលើបណ្តាញទំនាក់ទំនង នៅផ្នែកខាងត្បូងនិងខាងលិចប្រទេសរុស្ស៊ី។ វានៅមិនទាន់ច្បាស់នោះទេថាតើការអះអាងរបស់អ៊ុយក្រែនដែលបានវាយប្រហាររោងចក្រចម្រាញ់ប្រេង គឺជាការពិតឬយ៉ាងណា។

យោធាអ៊ុយក្រែនក៏បាននិយាយកាលពីថ្ងៃអាទិត្យថា ខ្លួនបានដណ្តើមយកមកវិញភូមិមួយក្នុងតំបន់ Sumy ពីកងទ័ពរុស្ស៊ី ដែលបានទទួលភាពរីកចម្រើនយ៉ាងច្រើននៅទីនោះនៅពេលថ្មីៗនេះ។

សង្រ្គាមរបស់រុស្ស៊ីនៅអ៊ុយក្រែនពេលនេះបានឈានចូលដល់ឆ្នាំទីបួន ខណៈមេដឹកនាំអឺរ៉ុបបានស្វាគមន៍ផែនការរបស់ប្រធានាធិបតីសហរដ្ឋអាមេរិក លោក Donald Trump ដើម្បីជួបពិភាក្សាដោយផ្ទាល់ជាមួយសមភាគីរុស្ស៊ីលោក Vladimir Putin ស្តីពីការបញ្ចប់ជម្លោះ។