អធិការបតីអាល្លឺម៉ង់ លោក Friedrich Merz កាលពីថ្ងៃអាទិត្យបានការពារការសម្រេចចិត្តរបស់លោកក្នុងការបញ្ឈប់ការនាំចេញសព្វាវុធទៅឲ្យប្រទេសអ៊ីស្រាអែល ដោយបញ្ជាក់ថាចំណាត់ការនេះបង្ហាញពីការមិនព្រមព្រៀងជាមួយរដ្ឋាភិបាលអ៊ីស្រាអែល។

នៅក្នុងបទសម្ភាសន៍ជាមួយប្រព័ន្ធផ្សព្វផ្សាយសាធារណៈ ARD លោក Merz បាននិយាយថា ការសម្រេចចិត្តនេះបានធ្វើឡើងបន្ទាប់ពីការពិភាក្សាជាច្រើនសប្តាហ៍ ហើយត្រូវបានជំរុញដោយចំណាត់ការរបស់គណៈរដ្ឋមន្ត្រីសន្តិសុខអ៊ីស្រាអែល ក្នុងការបង្កើនជម្លោះយោធានៅតំបន់ហ្កាហ្សាស្ទ្រីប។

លោកបានសម្តែងការព្រួយបារម្ភអំពីផែនការជម្លៀសប្រជាជនចេញពីទីក្រុងហ្កាហ្សា ដោយសង្កត់ធ្ងន់ថា ប្រទេសអាល្លឺម៉ង់ មិនអាចផ្គត់ផ្គង់សព្វាវុធនៅក្នុងជម្លោះដែលបច្ចុប្បន្ននេះត្រូវបានដោះស្រាយតាមមធ្យោបាយយោធា ជាមធ្យោបាយដែលអាចបណ្តាលឱ្យជនស៊ីវិលរាប់សែននាក់បាត់បង់ជីវិត។

កាលពីសប្តាហ៍មុននេះ នាយករដ្ឋមន្ត្រីអ៊ីស្រាអែល លោក Benjamin Netanyahu បានប្រាប់លោក Merz ពីការខកចិត្តរបស់លោកចំពោះការសម្រេចចិត្តរបស់ប្រទេសអាល្លឺម៉ង់ក្នុងការផ្អាកការនាំចេញយុទ្ធោបករណ៍ទាំងអស់ទៅឲ្យប្រទេសអ៊ីស្រាអែល ដោយបានចោទប្រកាន់ទីក្រុងប៊ែរឡាំងពី «ការផ្តល់រង្វាន់ដល់ក្រុមភេរវកម្មហាម៉ាស ដោយការដាក់បម្រាមអាវុធដល់អ៊ីស្រាអែល»។