ប្រធានាធិបតីហ្វីលីពីន លោក Ferdinand Marcos នៅថ្ងៃចន្ទ (ទី១១ ខែសីហា) Jr បានបញ្ជាក់ថា ទីក្រុងប៉េកាំង បាន «បកស្រាយខុស» ការអត្ថាធិប្បាយរបស់លោក ដោយប្រាប់ថា ទីក្រុងម៉ានីលនឹងត្រូវបានទាញដោយជៀសមិនរួចឲ្យចូលទៅក្នុងជម្លោះ រវាងចិន និងកោះតៃវ៉ាន់ ប្រសិនបើហេតុការណ៍នោះពិតជាផ្ទុះឡើងមែន។

គួរបញ្ជាក់ថា ប្រទេសចិនបានចោទប្រកាន់លោក Marcos ថា កំពុង «ប្រលែងលេងជាមួយភ្លើង» ពោលគឺនាំបញ្ហាមកដាក់ខ្លួន បន្ទាប់ពីមេដឹកនាំហ្វីលីពីន បានលើកឡើងក្នុងអំឡុងពេលបំពេញដំណើរទស្សនកិច្ចនៅប្រទេសឥណ្ឌាថា «គ្មានផ្លូវណាដែលហ្វីលីពីនអាចចៀសផុតពីការពាក់ព័ន្ធបាននោះឡើយ» ដោយសារតែនៅជិតកោះស្វ័យគ្រប់គ្រងតាមបែបប្រជាធិបតេយ្យមួយនេះ។

លោក Marcos បានប្រាប់សន្និសីទសារព័ត៌មានមួយថា៖ «ខ្ញុំគិតថា ក្នុងគោលបំណងឃោសនាបំភ័ន្ត យើងត្រូវបានបកស្រាយខុស»។ លោកបានបន្ថែមថា៖ «ខ្ញុំមានការងឿងឆ្ងល់បន្តិចថា ហេតុអ្វីបានជាវាត្រូវបានគេកំណត់លក្ខណៈដូចនេះ ពោលគឺត្រូវបានប្រដូចទៅនឹងការប្រលែងលេងជាមួយភ្លើង»។

លោក Marcos បានបន្ថែមថា ប្រជាជនហ្វីលីពីនដែលកំពុងធ្វើការ និងរស់នៅលើកោះតៃវ៉ាន់ នឹងត្រូវជម្លៀសចេញ ប្រសិនបើជម្លោះកើតឡើង ប៉ុន្តែលោកបានអះអាងថា លោកចង់បញ្ចៀសការប្រឈមមុខដាក់គ្នា និងសង្រ្គាម។ លោក Marcos បានសង្កត់ធ្ងន់ថា៖ «សង្រ្គាម នៅលើកោះតៃវ៉ាន់ នឹងទាញហ្វីលីពីនឲ្យទៅពាក់ព័ន្ធនឹងជម្លោះ ទោះចង់ ឬមិនចង់។ នោះហើយជាអ្វីដែលខ្ញុំកំពុងព្យាយាមនិយាយ»។

យោងតាមទិន្នន័យរបស់រដ្ឋាភិបាលហ្វីលីពីន ប្រជាជនហ្វីលីពីនជាង ១០០.០០០នាក់រស់នៅ និងធ្វើការនៅកោះតៃវ៉ាន់។ 

ការអត្ថាធិប្បាយរបស់លោក Marcos ធ្វើឡើងចំពេលដែលភាពតានតឹងកាន់តែខ្លាំងឡើងៗ រវាងទីក្រុងម៉ានីល និងទីក្រុងប៉េកាំង ជុំវិញជម្លោះដែនដី នៅសមុទ្រចិនខាងត្បូង។ ពាក់ព័ន្ធនឹងការពន្យល់របស់មេដឹកនាំហ្វីលីពីន ស្ថានទូតចិន ប្រចាំនៅទីក្រុងម៉ានីល មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ៕