ប្រព័ន្ធផ្សព្វផ្សាយរុស្ស៊ី បានរាយការណ៍កាលពីល្ងាចថ្ងៃអាទិត្យ (១០ សីហា) ដោយដកស្រង់សម្តីអនុរដ្ឋមន្ត្រីការបរទេស លោក Sergei Ryabkov ថា រុស្ស៊ីបានបន្តអភិវឌ្ឍប្រព័ន្ធមីស៊ីលរយៈចម្ងាយមធ្យម និងខ្លី ក្នុងអំឡុងពេលកិច្ចព្រមព្រៀងផ្អាកការដាក់ពង្រាយសព្វាវុធទាំងនោះ ហើយឥឡូវនេះខ្លួនមានឃ្លាំងអាវុធបែបនេះយ៉ាងច្រើនសន្ធឹកសន្ធាប់។

ទីភ្នាក់ងារសារព័ត៌មាន RIA បានដកស្រង់សម្តីលោក Ryabkov ដែលបានថ្លែងក្នុងបទសម្ភាសន៍មួយថា៖ "នៅពេលដែលសន្ធិសញ្ញាផ្អាកត្រូវបានប្រកាស រុស្ស៊ីបានបញ្ជាក់យ៉ាងច្បាស់ហើយថាកិច្ចព្រមព្រៀងនោះអនុវត្តចំពោះតែការដាក់ពង្រាយប៉ុណ្ណោះ ហើយមិនបាននិយាយអំពីការបញ្ឈប់ណាមួយចំពោះសកម្មភាពស្រាវជ្រាវ និងអភិវឌ្ឍនោះទេ"។

សេចក្ដីរាយការណ៍របស់ RIA បន្តថា "ដូច្នេះពេលវេលានោះត្រូវបានប្រើដើម្បីអភិវឌ្ឍប្រព័ន្ធសមស្រប និងកសាងឃ្លាំងអាវុធដ៏ច្រើនសន្ធឹកសន្ធាប់មួយនៅក្នុងវិស័យនេះ ហើយឥឡូវនេះរុស្ស៊ីកំពុងតែមានយ៉ាងច្រើន"។

កាលពីដើមខែនេះ រុស្ស៊ីនិយាយថា ខ្លួនកំពុងលុបចោលនូវអ្វីដែលខ្លួនហៅថា សន្ធិសញ្ញាផ្អាកជាឯកតោភាគីលើការដាក់ពង្រាយមីស៊ីលរយៈចម្ងាយមធ្យម ដោយនិយាយថា នេះគឺជាការឆ្លើយតបដោយបង្ខំចំពោះសកម្មភាពបស់សហរដ្ឋអាមេរិក និងសម្ព័ន្ធមិត្ត៕