ស៊ីហ្គេម៖ ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ រៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) និងជាអគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បានអំពាវនាវយ៉ាងទទូចឲ្យគ្រប់ភាគីពាក់ព័ន្ធ រាប់ពីគ្រូបង្វឹក និងកីឡាករ-កីឡាការិនីជម្រើសជាតិ សហព័ន្ធជាតិ និងបណ្ដាក្លិបទាំងអស់ ត្រូវបង្កើនការយកចិត្តទុកដាក់កាន់តែខ្លាំងបន្ថែមទៀត ក្នុងការកាត់ផ្ដាច់ការចម្លងជំងឺកូវីដ-១៩ ដល់មជ្ឈដ្ឋានកីឡា ដើម្បីរួមចំណែកទប់ស្កាត់ការរីករាលដាល ជំងឺដ៏កាចសាហាវនេះក្នុងសហគមន៍កម្ពុជា។
ការលើកឡើងនេះ ស្របពេលស្ថានភាពជំងឺកូវីដ-១៩ កំពុងរីករាលដាលខ្លាំងនៅកម្ពុជា នៅតាមបណ្ដាខេត្ត-ខណ្ឌជាច្រើន រហូតដល់ផ្នែកវិស័យសិល្បៈថែមទៀត។ ដូច្នេះក្នុងនាម CAMSOC ក៏ដូចជា NOCC ឯកឧត្តម វ៉ាត់ ចំរើន បានអំពាវនាវដល់គ្រូបង្វឹកជម្រើសជាតិ សហព័ន្ធជាតិ និងក្លិបទាំងអស់ដែលហ្វឹកហាត់តាមបណ្ដាខេត្ត ក៏ដូចជាក្នុងរាជធានីភ្នំពេញ សូមមេត្តាជួយធ្វើយ៉ាងណាឲ្យមានការប្រយ័ត្នខ្ពស់ ក្នុងការរក្សានូវវិធានការ ៣ការពារ ៣កុំ ចៀសវាងនូវការចម្លងជំងឺដ៏កាចសាហាវនេះក្នុងមជ្ឈដ្ឋានកីឡា ហើយបើមិនចាំបាច់សូមនៅនឹងកន្លែង ក្នុងរយៈពេលរីករាលដាលខ្លាំងនេះ តាមសេចក្ដីប្រកាសរបស់រាជរដ្ឋាភិបាល។
ទន្ទឹមជាមួយគ្នាផងដែរ ឯកឧត្ដមបានស្នើសូមឲ្យកីឡាករ-កីឡាការិនីជម្រើសជាតិទាំងអស់ បន្ដហ្វឹកហាត់កម្លាំងកាយ បច្ចេកទេសមូលដ្ឋានតាមទីកន្លែងសុវត្ថិភាព តាមផ្ទះរៀងៗខ្លួនឲ្យបានជាប់លាប់ និងទៀងទាត់បំផុត ចៀសវាងការកុំឲ្យមានការឡើងទម្ងន់ ដោយហាត់យ៉ាងតិច ៣ម៉ោងក្នុងមួយថ្ងៃដើម្បីរក្សាទម្ងន់ និងកម្លាំងនៅខ្លាំងដដែល ពិសេសត្រូវអនុវត្តតាមគោលការណ៍ ៣ របស់គណៈកម្មាធិការអូឡាំពិកអន្តរជាតិ ទី១- គឺ Stay strong មានន័យថា រស់នៅដោយភាពសកម្ម និងរក្សាភាពខ្លាំងជារៀងរហូត ទី២-គឺ Stay safe មានន័យថា រស់នៅដោយមានសុវត្ថិភាព និងទី៣-គឺ Stay healthy មានន័យថា ត្រូវរស់នៅដោយមានសុខភាពល្អជានិច្ច។
ក្នុងកាលៈទេសៈដ៏លំបាក ស្របពេលប្រទេសជាតិកំពុងទទួលរង នូវការរីករាលខ្លាំងនៃជំងឺកូវីដ-១៩ នេះ ឯកឧត្តម វ៉ាត់ ចំរើន សង្ឃឹមយ៉ាងមុតមាំថា គ្រប់ភាគីពាក់ព័ន្ធក្នុងវិស័យកីឡា ពិសេសកីឡាករ-កីឡាការិនីជម្រើសជាតិ ត្រូវមានភាពម្ចាស់ការលើខ្លួនឯង ដោយគោរពតាមវិធានការផ្សេងៗរបស់ក្រសួងសុខាភិបាល និងការណែនាំដ៏ខ្ពស់របស់សម្ដេចតេជោនាយករដ្ឋមន្ដ្រី ដើម្បីទប់ស្កាត់ការរីករាលដាលនៃជំងឺកូវីដ-១៩ ហើយក៏អនុវត្តតាមផែនការហ្វឹកហាត់ ដែលគ្រូបង្វឹកដាក់ឲ្យដើម្បីពង្រឹង និងរក្សាគុណផលកីឡា ត្រៀមឆ្ពោះទៅការប្រកួតកីឡាស៊ីហ្គេម នៅវៀតណាមនាចុងឆ្នាំ២០២១ និងស៊ីហ្គេមឆ្នាំ២០២៣ នៅកម្ពុជាផងដែរ។
សូមបញ្ជាក់ថា អំឡុងពេលនៃការរីករាលដាលខ្លាំងជំងឺកូវីដ-១៩ ក្នុងព្រឹត្តិការណ៍សហគមន៍ ២០កុម្ភៈ ក្រោយទទួលបានការអនុញ្ញាតដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា គណៈកម្មាធិការជាតិ CAMSOC ក៏បានរៀបចំចាក់វ៉ាក់ការពារជំងឺនេះ ដល់គ្រូបង្វឹក កីឡាករ-កីឡាការិនីជម្រើសជាតិ រួមទាំងថ្នាក់ដឹកនាំ និងមន្ដ្រីកីឡាចំនួន ១,០៥១នាក់មកហើយ ខណៈចាក់លើកទី១ កាលពីថ្ងៃទី០២,០៣ និងថ្ងៃទី០៤ ខែមីនាថ្មីៗ គឺចាក់បានជាង ៨០០នាក់ ហើយនៅសេសសល់ប៉ុន្មាន នឹងបន្ដចាក់ទៀតនាពេលឆាប់ៗខាងមុខ។ នេះបើតាមការបញ្ជាក់របស់ឯកឧត្តម វ៉ាត់ ចំរើន កាលពីថ្មីៗ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
