ហ្វូងមនុស្សរាប់រយនាក់បានដង្ហែក្បួនបាតុកម្មនៅទីក្រុងឡុងដ្រ៍ របស់ចក្រភពអង់គ្លេស កាលពីថ្ងៃអាទិត្យ (១០ សីហា) ដើម្បីទាមទារឱ្យមានការដោះលែងចំណាប់ថ្នូរអ៊ីស្រាអែល ដែលត្រូវឃុំខ្លួនដោយក្រុមសកម្មប្រយុទ្ធប៉ាឡេស្ទីន ហាម៉ាស នៅតំបន់ហ្កាហ្សា និងដើម្បីរិះគន់ការគ្រោងទុករបស់ចក្រភពអង់គ្លេស ចំពោះការទទួលស្គាល់រដ្ឋប៉ាឡេស្ទីន។

ដោយមានការចូលរួមដោយសាច់ញាតិជាច្រើននៃចំណាប់ថ្នូរ ការហែក្បួននេះបានបញ្ចប់នៅមុខការិយាល័យ Downing Street របស់លោកនាយករដ្ឋមន្ត្រីអង់គ្លេស Keir Starmer ដែលបាននិយាយថា ចក្រភពអង់គ្លេសនឹងទទួលស្គាល់រដ្ឋប៉ាឡេស្ទីន ប្រសិនបើអ៊ីស្រាអែល មិនយល់ព្រមបទឈប់បាញ់ក្នុងសង្គ្រាមជាមួយក្រុមហាម៉ាសទេនោះ។

អ្នកតវ៉ាជាច្រើនបានគ្រវីទង់ជាតិអ៊ីស្រាអែលមានខ្សែបូពណ៌លឿង ដែលជានិមិត្តរូបនៃសាមគ្គីភាពជាមួយចំណាប់ថ្នូរ ហើយអ្នករៀបចំការហែក្បួនបាតុកម្មនិយាយថា អ្នកជាប់ឃុំក្នុងដៃក្រុមហាម៉ាស គួរតែជាអាទិភាពរបស់ចក្រភពអង់គ្លេស មិនមែនរឿងទទួលស្គាល់រដ្ឋប៉ាឡេស្ទីននោះទេ។

ក្នុងចំណោមចំណាប់ថ្នូរប្រមាណ ២៥១នាក់ ដែលក្រុមហាម៉ាស បានចាប់ខ្លួនក្នុងការវាយប្រហារលើអ៊ីស្រាអែលនៅថ្ងៃទី៧ ខែតុលា ឆ្នាំ២០២៣ ដែលបានបញ្ឆេះសង្រ្គាមនៅតំបន់ហ្កាហ្សា នៅសល់ចំណាប់ថ្នូរ ៤៩នាក់ នៅតែត្រូវជាប់ឃុំឃាំង ដោយក្នុងនោះមាន ២៧នាក់ ដែលកងទ័ពអ៊ីស្រាអែល និយាយថាបានស្លាប់បាត់ទៅហើយ៕