លោក Fu Cong តំណាងអចិន្ត្រៃយ៍របស់ប្រទេសចិន ប្រចាំនៅអង្គការសហប្រជាជាតិ (UN) កាលពីថ្ងៃអាទិត្យ (ទី១០ ខែសីហា) បានបញ្ជាក់ថា ប្រទេសចិនប្រឆាំងដាច់ខាតរាល់ការប៉ុនប៉ង ដើម្បីកាន់កាប់តំបន់ហ្កាហ្សា។

អំឡុងពេលថ្លែងនៅឯកិច្ចប្រជុំបន្ទាន់របស់ក្រុមប្រឹក្សាសន្តិសុខអង្គការសហប្រជាជាតិ ស្តីពីផែនការរបស់អ៊ីស្រាអែល ដើម្បីកាន់កាប់ទីក្រុងហ្កាហ្សា លោក Fu បានលើកឡើងថា ក្រុមប្រឹក្សាសន្តិសុខ និងសហគមន៍អន្តរជាតិ ត្រូវតែចាត់វិធានការយ៉ាងម៉ឺងម៉ាត់ និងចាំបាច់ មុនពេលគ្រោះមហន្តរាយមនុស្សធម៌កាន់តែធំ កើតមានឡើង។ លោក Fu បានសង្កត់ធ្ងន់ថា ចិនប្រឆាំងដាច់ខាត ចំពោះការប៉ុនប៉ងណាមួយ ដើម្បីកាន់កាប់តំបន់ហ្កាហ្សា។

លោក Fu បានប្រាប់ថា៖ «ថ្មីៗនេះ គណៈរដ្ឋមន្ត្រីសន្តិសុខរបស់អ៊ីស្រាអែល បានអនុម័តផែនការមួយ ដើម្បីកាន់កាប់តំបន់ហ្កាហ្សា។ ប្រទេសចិនមានក្ដីបារម្ភយ៉ាងខ្លាំង អំពីបញ្ហានេះ ហើយជំរុញឲ្យអ៊ីស្រាអែលបញ្ឈប់សកម្មភាពដ៏គ្រោះថ្នាក់នេះ។ តំបន់ហ្កាហ្សាជាកម្មសិទ្ធិរបស់ប្រជាជនប៉ាឡេស្ទីន និងជាផ្នែកសំខាន់មួយនៃដែនដីប៉ាឡេស្ទីន។ ការប៉ុនប៉ងណាមួយ ដើម្បីផ្លាស់ប្តូររចនាសម្ព័ន្ធប្រជាសាស្រ្ត និងរចនាសម្ព័ន្ធដែនដីរបស់ហ្កាហ្សា ត្រូវតែមានការជំទាស់យ៉ាងខ្លាំងក្លា»។

លោក Fu បានសង្កត់ធ្ងន់លើតម្រូវការ ក្នុងការបោះបង់ចោលផ្នត់គំនិត «ប្រើប្រាស់កម្លាំង» ដោយនិយាយថា មានតែបទឈប់បាញ់ភ្លាមៗប៉ុណ្ណោះ ទើបអាចជួយសង្គ្រោះជីវិតមនុស្សបានកាន់តែច្រើន និងបង្កើតលក្ខខណ្ឌ សម្រាប់ការដោះលែងចំណាប់ថ្នូរ។

យោងតាមលោក Fu ដដែល បានឲ្យដឹងទៀតថា ប្រទេសចិននឹងបន្តធ្វើការជាមួយសហគមន៍អន្តរជាតិដើម្បីបញ្ចប់ការប្រយុទ្ធគ្នា នៅតំបន់ហ្កាហ្សា កាត់បន្ថយវិបត្តិមនុស្សធម៌ និងប្រឹងប្រែង ដើម្បីសម្រេចបាននូវដំណោះស្រាយដ៏ទូលំទូលាយ យុត្តិធម៌ និងយូរអង្វែង ចំពោះបញ្ហាប៉ាឡេស្ទីន៕