អាជ្ញាធរជប៉ុន នៅថ្ងៃចន្ទ (ទី១១ ខែសីហា) បានជំរុញមនុស្សរាប់លាននាក់ជម្លៀសចេញពីផ្ទះសម្បែងរបស់ពួកគេ បន្ទាប់ពីភ្លៀងធ្លាក់ខ្លាំង បានបង្កឲ្យមានទឹកជំនន់ និងបំណាក់ដី នៅភាគនិរតីរបស់ប្រទេសនេះ ដែលបានធ្វើឲ្យអ្នកស្រុកជាច្រើននាក់បាត់ខ្លួន។

រូបភាពតាមទូរទស្សន៍ពីសហគមន៍ផ្សេងៗ ក្នុងខេត្ត Kumamoto បានបង្ហាញឲ្យឃើញផ្ទះសម្បែង ហាងលក់ទំនិញ និងរថយន្ត បានលិចនៅក្នុងទឹកកម្ពស់ប្រហែលមួយម៉ែត្រ។ ទឹកទន្លេដែលឡើងកាន់ខ្លាំង បានហូរកាត់យានយន្ត និងផ្លូវថ្នល់ដែលរងការខូចខាត។

យោងតាមទីភ្នាក់ងារឧតុនិយមជប៉ុន បានឲ្យដឹងថា ក្នុងរយៈពេល ៦ម៉ោង គិតត្រឹមព្រឹកថ្ងៃទី១១ ខែសីហានេះ កម្រិតទឹកភ្លៀងជាង ៣៧សង់ទីម៉ែត្រ ធ្លាក់នៅក្នុងទីក្រុង Tamana ដែលជាតំបន់រងគ្រោះខ្លាំងបំផុតរបស់ខេត្ត Kumamoto ដោយនេះជាកម្រិតកំណត់ត្រាសម្រាប់តំបន់នេះ។

ទីភ្នាក់ងារអាកាសធាតុបានឲ្យដឹងថា៖ «ស្ថានភាពនេះគំរាមកំហែងដល់អាយុជីវិត ហើយសុវត្ថិភាពត្រូវតែមានការធានាភ្លាមៗ។ ចាំបាច់តម្រូវឲ្យមានការប្រុងប្រយ័ត្នជាអតិបរមា សូម្បីតែនៅកន្លែងដែលគ្រោះមហន្តរាយ មិនត្រូវបានចាត់ទុកថា កើតមានក៏ដោយ»។

យោងតាមទីភ្នាក់ងារគ្រប់គ្រងអគ្គិភ័យ និងគ្រោះមហន្តរាយ បានឲ្យដឹងថា ការណែនាំ អំពីការជម្លៀស និងការព្រមានត្រូវបានចេញដល់ប្រជាជនជាង ៣លាននាក់ នៅក្នុងតំបន់ភាគនិរតី។ ទីភ្នាក់ងារនេះ បានបន្ថែមថា អ្នកស្រុកប្រហែល ៣៨៤.០០០នាក់ ភាគច្រើននៅខេត្ត Kumamoto បានប្រឈមនឹងការព្រមាន អំពីការជម្លៀសធ្ងន់ធ្ងរបំផុតរបស់ប្រទេសជប៉ុន៕