ទូរទស្សន៍រដ្ឋ CCTV រាយការណ៍នៅថ្ងៃចន្ទនេះថា ពលរដ្ឋជិត ១ម៉ឺននាក់ ត្រូវបានជម្លៀសខ្លួនចេញ ក្រោយទឹកជំនន់ដ៏គំហុកបង្កឡើងដោយសារភ្លៀងធ្លាក់ខ្លាំង បានសម្លាប់មនុស្ស ១៣នាក់ និងមនុស្ស ៣០នាក់ផ្សេងទៀត កំពុងបាត់ខ្លួននៅខេត្តភាគពាយ័ព្យ Gansu ។

រូបថតសន្លឹកនៅលើទូរទស្សន៍ CCTV ឃើញផ្ទះសម្បែង និងផ្លូវថ្នល់រងការបំផ្លិចបំផ្លាញ ខណៈកិច្ចខិតខំជួយសង្រ្គោះបន្ទាន់ និងរុករក នៅតែបន្ត ។

ទូរទស្សន៍ CCTV រាយការណ៍ថា ភ្លៀងធ្លាក់ខ្លាំង បានចាប់ផ្តើមកាលពីវេលាម៉ោង ៦ល្ងាច ម៉ោងក្នុងស្រុកថ្ងៃព្រហស្បតិ៍សប្តាហ៍មុន ហើយបង្កឲ្យមានទឹកជំនន់ដ៏គំហុកនៅទីក្រុង Yuzhong ខេត្ត Gansu បណ្តាលឲ្យជាប់ខ្លួនមនុស្សប្រហែល ៤ពាន់នាក់ ។

កាលពីថ្ងៃសុក្រកន្លងទៅ ប្រធានាធិបតីចិនលោក Xi Jinping បានបញ្ជាឲ្យមានកិច្ចខិតខំជួយសង្រ្គោះពេញបន្ទុកដល់ជនរងគ្រោះ ។

ភ្លៀងធ្លាក់ខ្លាំង បានវាយប្រហារតំបន់ភាគខាងជើង និងតំបន់ភាគខាងត្បូងប្រទេសចិន ក្នុងរយៈពេលប៉ុន្មានសប្តាហ៍កន្លងមកនេះ ខណៈក្រុមឧតុនិយមនិយាយថា ស្ថានភាពអាកាសធាតុអាក្រក់បែបនេះ មានការជាប់ពាក់ព័ន្ធនឹងបញ្ហាបម្រែបម្រួលអាកាសធាតុ ៕