ប្រមុខនៃស្ថាប័នសន្តិសុខជាន់ខ្ពស់របស់អ៊ីរ៉ង់ លោក Ali Larijani នឹងទៅបំពេញទស្សនកិច្ចនៅអ៊ីរ៉ាក់ នៅថ្ងៃចន្ទនេះ មុនពេលធ្វើដំណើរទៅកាន់ប្រទេសលីបង់ ជាកន្លែងដែលរដ្ឋាភិបាលបានអនុម័តផែនការមួយ ដើម្បីដកហូតអាវុធពីសម្ព័ន្ធមិត្តហេសបូឡារបស់ទីក្រុងតេអេរ៉ង់។

ទូរទស្សន៍រដ្ឋ បានរាយការណ៍ថា៖ លោក Ali Larijani បានចេញណើរ នៅថ្ងៃនេះ (ថ្ងៃចន្ទ) ទៅកាន់ប្រទេសអ៊ីរ៉ាក់ និងបន្ទាប់មកទៅកាន់ប្រទេសលីបង់ ក្នុងដំណើរទស្សនកិច្ចរយៈពេល បីថ្ងៃ ដែលជាការធ្វើដំណើរក្រៅប្រទេសលើកដំបូងរបស់លោក ចាប់តាំងពីចូលកាន់តំណែង កាលពីសប្តាហ៍មុន»។

លោក Larijani នឹងចុះហត្ថលេខាលើកិច្ចព្រមព្រៀងសន្តិសុខទ្វេភាគី នៅក្នុងប្រទេសអ៊ីរ៉ាក់ មុនពេលធ្វើដំណើរទៅកាន់ប្រទេសលីបង់ ជាកន្លែងដែលគាត់នឹងជួបជាមួយមន្ត្រីជាន់ខ្ពស់លីបង់ និងឥស្សរជន។

ដំណើរទស្សនកិច្ចរបស់លោកទៅកាន់ប្រទេសលីបង់ កើតឡើង បន្ទាប់ពីទីក្រុងតេអេរ៉ង់ បានសម្តែងការប្រឆាំងយ៉ាងដាច់ខាតចំពោះផែនការរបស់រដ្ឋាភិបាលលីបង់ ក្នុងការដកហូតអាវុធពីសម្ព័ន្ធមិត្តរបស់ទីក្រុងតេអេរ៉ង់ ជាជំហរមួយដែលត្រូវបានថ្កោលទោសដោយទីក្រុងបេរូតថា ជា «ការជ្រៀតជ្រែកយ៉ាងច្បាស់ និងមិនអាចទទួលយកបាន»។

លោកLarijani បានប្រាប់ទូរទស្សន៍រដ្ឋ មុនពេលចេញដំណើរថា៖«កិច្ចសហប្រតិបត្តិការរបស់យើងជាមួយរដ្ឋាភិបាលលីបង់ មានរយៈពេលយូរ និងស៊ីជម្រៅ។ យើងពិគ្រោះយោបល់លើបញ្ហាផ្សេងៗក្នុងតំបន់។ ក្នុងបរិបទពិសេសនេះ យើងនឹងនិយាយជាមួយមន្ត្រីលីបង់ និងឥស្សរជនដ៏មានឥទ្ធិពល នៅក្នុងប្រទេសលីបង់»។