អេស្ប៉ាញ និងប្រទេសអឺរ៉ុបចំនួន ៧ផ្សេងទៀត កាលពីថ្ងៃអាទិត្យ (ទី១០ ខែសីហា) បានថ្កោលទោសផែនការរបស់អ៊ីស្រាអែល ក្នុងការកាន់កាប់ទីក្រុងហ្កាហ្សា ដោយព្រមានថា ការធ្វើបែបនោះនឹងធ្វើឲ្យជនស៊ីវិលមួយចំនួនធំស្លាប់ និងបង្ខំប្រជាជនប៉ាឡេស្ទីនជិតមួយលាននាក់ចេញពីផ្ទះសម្បែងរបស់ពួកគេ។

គណៈរដ្ឋមន្ត្រីសន្តិសុខរបស់នាយករដ្ឋមន្ត្រីអ៊ីស្រាអែល លោក Benjamin Netanyahu កាលពីថ្ងៃសុក្រសប្ដាហ៍កន្លងមក បានផ្ដល់ភ្លើងខៀវដល់ផែនការ សម្រាប់ប្រតិបត្តិការដ៏សំខាន់មួយ ដើម្បីដណ្តើមកាន់កាប់ទីក្រុងហ្កាហ្សា ដែលនាំឲ្យមានការរិះគន់ជាបន្តបន្ទាប់ ទាំងក្នុងស្រុក និងអន្តរជាតិ។

នៅក្នុងសេចក្តីថ្លែងការណ៍រួមមួយ រដ្ឋមន្ត្រីការបរទេសនៃប្រទេសទាំង៨ បានលើកឡើងថា ការសម្រេចនេះ «នឹងធ្វើឲ្យវិបត្តិមនុស្សធម៌កាន់តែធ្ងន់ធ្ងរឡើងៗ និងនាំឲ្យមានគ្រោះថ្នាក់ដល់អាយុជីវិតរបស់ចំណាប់ថ្នូរនៅសល់»។

បើយោងតាមច្បាប់ចម្លងនៃសេចក្តីថ្លែងការណ៍ដែលចេញផ្សាយដោយក្រសួងការបរទេសអេស្ប៉ាញ បានឲ្យដឹងបន្ថែមថា តាមការប៉ាន់ប្រមាណទុក ប្រតិបត្តិការនេះអាចនាំឲ្យមាន «ចំនួនអ្នកស្លាប់ខ្ពស់ដែលមិនអាចទទួលយកបាន និងការផ្លាស់ទីលំនៅដោយបង្ខំ ចំពោះជនស៊ីវិលប៉ាឡេស្ទីនជិត ១លាននាក់»។

ប្រទេសនោះក៏បានព្រមានផងដែរថា ការវាយលុក និងការកាន់កាប់ទីក្រុងហ្កាហ្សា ដែលត្រូវបានគ្រោងទុក នឹងក្លាយជា «ឧបសគ្គចម្បងក្នុងការអនុវត្តដំណោះស្រាយរដ្ឋ២ ដែលជាផ្លូវតែមួយគត់ឆ្ពោះទៅរកសន្តិភាពដ៏ទូលំទូលាយ យុត្តិធម៌ និងយូរអង្វែង។

ក្រៅពីអេស្ប៉ាញ សេចក្តីថ្លែងការណ៍នេះត្រូវបានចុះហត្ថលេខាដោយរដ្ឋមន្ត្រីការបរទេសនៃប្រទេសអ៊ីស្លង់ អៀរឡង់ លុចសំបួ ម៉ាល់តា ន័រវែស ព័រទុយហ្គាល់ និងស្លូវេនី៕