អគ្គលេខាធិការអង្គការណាតូ លោក Mark Rutte បាននិយាយថា ការផ្គត់ផ្គង់សព្វាវុធអាមេរិកដែលឧបត្ថម្ភដោយអឺរ៉ុបដល់អ៊ុយក្រែន នឹងបន្ត ដោយមិនគិតពីលទ្ធផលនៃកិច្ចប្រជុំកំពូលរុស្ស៊ី-អាមេរិក នៅថ្ងៃទី ១៥ ខែសីហានោះទេ។

លោកបាននិយាយនៅក្នុងបទសម្ភាសន៍ជាមួយសារព័ត៌មាន CBS News ថា៖«ជាការពិតណាស់ ពួកគេនឹងបន្ត»។

លោកបាននិយាយថា៖«ដូច្នេះយើងមានកញ្ចប់ពីរដំបូង ដែលធ្វើឡើងដោយប្រទេសហូឡង់ និងបន្ទាប់មកដោយដាណឺម៉ាក់ ន័រវែស និងស៊ុយអែត ។ ខ្ញុំរំពឹងថា នឹងមានសេចក្តីប្រកាសបន្ថែមទៀត នៅក្នុងប៉ុន្មានថ្ងៃ និងសប្តាហ៍ខាងមុខនេះ ហើយការផ្គត់ផ្គង់ជំនួយនេះ គឺសំខាន់ណាស់។

កាលពីថ្ងៃទី ១៤ ខែកក្កដា លោកប្រធានាធិបតី ដូណាល់ ត្រាំ (Donald Trump) បានប្រកាស នៅក្នុងកិច្ចប្រជុំជាមួយអគ្គលេខាធិការអង្គការណាតូ លោក Mark Rutte ថា លោកទាំងពីរ បានយល់ព្រមលើការប្រគល់អាវុធរបស់អាមេរិកដល់អ៊ុយក្រែន ដែលការចំណាយជាបន្ទុករបស់បណ្តាប្រទេសអឺរ៉ុប។ សម្ព័ន្ធភាពយោធានេះនឹងសម្របសម្រួលការដឹកជញ្ជូនដែលនឹងរួមបញ្ចូលអាវុធដូចជាប្រព័ន្ធការពារដែនអាកាស Patriot។ លោកប្រធានាធិបតីអាមេរិក បាននិយាយថា ទំហំជំនួយយោធាដែលនឹងត្រូវផ្គត់ផ្គង់ដល់អ៊ុយក្រែនតាមរយៈអង្គការណាតូ នឹងមានចំនួនរាប់ពាន់លានដុល្លារ។