ប្រភពយោធាប៉ាគីស្ថាន បាននិយាយកាលពីថ្ងៃអាទិត្យថា កិច្ចព្រមព្រៀងពាណិជ្ជកម្មថ្មីៗនេះរបស់ប្រទេសប៉ាគីស្ថាន ជាមួយសហរដ្ឋអាមេរិក ត្រូវបានគេរំពឹងថា នឹងនាំមកនូវការវិនិយោគដ៏ធំដល់ប្រទេសអាស៊ីខាងត្បូងមួយនេះ។ ប្រភពពីយោធាប៉ាគីស្ថានបាននិយាយកាលពីថ្ងៃអាទិត្យដោយដកស្រង់សម្តីរបស់ប្រមុខកងទ័ពលោក Asim Munir ដែលកំពុងបំពេញទស្សនកិច្ចនៅសហរដ្ឋអាមេរិក។

លោកអគ្គមេបញ្ជការ Munir មានទំនាក់ទំនងជាមួយយោធាអាមេរិកជាន់ខ្ពស់ និងថ្នាក់ដឹកនាំនយោបាយ ក្នុងអំឡុងដំណើរទស្សនកិច្ចបន្តរបស់លោក បន្ទាប់ពីទំនាក់ទំនងតានតឹងជាច្រើនឆ្នាំ ភាគច្រើនដោយសារតែការខ្វែងគំនិតគ្នាលើបញ្ហាប្រឆាំងភេរវកម្ម។

ប្រទេសប៉ាគីស្ថានសម្លឹងមើលកិច្ចសហប្រតិបត្តិការកាន់តែសំខាន់ឡើងជាមួយសហរដ្ឋអាមេរិក ក្រោមការដឹកនាំរបស់លោកប្រធានាធិបតី ដូណាល់ ត្រាំ( Donald Trump) ហើយប្រទេសទាំងពីរ ហាក់ដូចជាចង់កសាងទំនាក់ទំនងយោធា និងសេដ្ឋកិច្ចរបស់ពួកគេឡើងវិញ ក្នុងរយៈពេលប៉ុន្មានខែថ្មីៗនេះ។

កាលពីថ្ងៃអាទិត្យ ប្រមុខកងទ័ពរូបនេះ បានជួបជាមួយក្រុមជនជាតិប៉ាគីស្ថាននៅក្រៅប្រទេស ហើយបាននិយាយជាមួយពួកគេអំពីដំណើរទស្សនកិច្ចរបស់លោក និងបញ្ហាជាច្រើននៃសារៈសំខាន់ជាតិសម្រាប់ទីក្រុងអ៊ីស្លាម៉ាបាដ។ នេះបើយោងតាមប្រភពយោធាប៉ាគីស្ថាន។