នៅក្នុងបទសម្ភាសន៍មួយដែលបានចេញផ្សាយនៅថ្ងៃចន្ទ (ទី១១ ខែសីហា) នេះ រដ្ឋមន្ត្រីការពារជាតិរបស់ប្រទេសអ៊ីតាលី បានលើកឡើងថា រដ្ឋាភិបាលរបស់អ៊ីស្រាអែលបាន «បាត់បង់ហេតុផល និងមនុស្សធម៌» អស់ហើយ នៅតំបន់ហ្កាហ្សា ហើយបានបង្ហាញនូវការបើកចំហ ចំពោះលទ្ធភាពនៃការមានទណ្ឌកម្ម។

រដ្ឋមន្ត្រីការពារជាតិ លោក Guido Crosetto បានប្រាប់សារព័ត៌មាន La Stampa ថា៖ «អ្វីដែលកំពុងកើតឡើង គឺមិនអាចទទួលយកបានឡើយ។ យើងមិនមែនកំពុងប្រឈមជាមួយប្រតិបត្តិការយោធាដែលបង្កឲ្យមានការខូចខាតកើតឡើងដំណាលគ្នានោះទេ ប៉ុន្តែជាការបដិសេធយ៉ាងច្បាស់នូវច្បាប់ និងតម្លៃមូលដ្ឋាននៃអរិយធម៌របស់យើង»។

លោកបានបន្ថែមថា៖ «យើងប្តេជ្ញាចិត្ត ចំពោះការផ្ដល់ជំនួយមនុស្សធម៌ ប៉ុន្តែឥឡូវនេះ យើងត្រូវរកវិធី ដើម្បីជំរុញឲ្យលោក (Benjamin) Netanyahu គិតគូរឲ្យបានច្បាស់លាស់ លើសពីការថ្កោលទោស»។

នៅពេលត្រូវបានសួរ អំពីលទ្ធភាពនៃការដាក់ទណ្ឌកម្មអន្តរជាតិ ចំពោះអ៊ីស្រាអែល លោក Crosetto បានឆ្លើយតបថា៖ «ការកាន់កាប់តំបន់ហ្កាហ្សា និងវិធានការធ្ងន់ធ្ងរមួយចំនួន នៅតំបន់ West Bank បង្ហាញពីការកើនឡើងនូវភាពតានតឹងយ៉ាងខ្លាំង នៅចំពោះមុខការសម្រេចដែលជំរុញឲ្យលោក Netanyahu ពិចារណា»។

ការលើកឡើងរបស់លោក Crosetto នេះ បានកើតមានបន្ទាប់ពីលោក Netanyahu បាននិយាយការពារផែនការរបស់លោក ក្នុងការកាន់កាប់ទីក្រុងហ្កាហ្សា និងកំណត់គោលដៅលើទីតាំងនៅសល់របស់ក្រុមហាម៉ាស ជាផែនការដែលបង្កឲ្យមានការរិះគន់ពីជុំវិញពិភពលោក៕