ក្រោយអាកាសធាតុត្រជាក់ជាងមុនមួយរយៈពេល តំបន់ភាគកណ្តាល និងតំបន់ភាគខាងកើតអឺរ៉ុប ប្រឈមនឹងរលកកម្តៅមួយទៀត ពេលដែលខ្យល់ក្តៅលើតំបន់ភាគនិរទេសអឺរ៉ុប បក់ឆ្ពោះទៅកាន់ភាគពាយព្យ ធ្វើឲ្យសីតុណ្ហភាពកើនឡើងរហូតដល់ ៤៤អង្សាសេ ។

ចាប់តាំងពីចុងខែកក្កដារហូតមក តំបន់ជាច្រើននៅឧបទ្វីបអ៊ីបេរី បានមើលឃើញរលកកម្តៅក្តៅខ្លាំង ពេលដែលសីតុណ្ហភាពកើនឡើងពី ៣០អង្សាសេ ឡើងដល់ ៤០អង្សាសេ ។

ថ្ងៃព្រហស្បតិ៍សប្តាហ៍មុន ស្ថានីយឧតុនិយមស្ថិតនៅ ៣៥០ម៉ែត្រពីលើនីវ៉ូទឹកសមុទ្រក្នុងទីក្រុង Talavera de la Reina ប្រទេសអេស្ប៉ាញ បានរកឃើញសីតុណ្ហភាពកើនឡើងរហូតដល់ ៤២,៧អង្សាសេ ពោលគឺមានចំនួន ១៨អង្សាសេពីលើកម្រិតសីតុណ្ហភាពធម្មតាក្នុងខែសីហា ។

អាកាសធាតុក្តៅខ្លាំងនេះដែរ បានវាយប្រហារតំបន់ភាគខាងត្បូងប្រទេសបារាំង ធ្វើឲ្យតំបន់មួយចំនួនមានសីតុណ្ហភាពចន្លោះពី ៣០-៣៥អង្សាសេ ។

ទោះបីជាយ៉ាងណាក៏ដោយ ប្រជាពលរដ្ឋក្នុងស្រុក និងភ្ញៀវទេសចរនៅទីក្រុងប៉ារីស នាំគ្នានិយាយថា អាកាសធាតុក្តៅប្រសើរជាងមានភ្លៀងធ្លាក់ ។ 

អ្នកស្រី Kristien De Marteler គឺជាភ្ញៀវទេសចរមួយមកពីប្រទេសបែលហ្ស៊ិក និងកំពុងធ្វើដំណើរកម្សាន្តនៅទីក្រុងប៉ារីស និយាយថា គាត់គិតថា ការជ្រើសរើសពេលវេលា វាសំខាន់ ។ នៅពេលព្រឹកអ្នកអាចដើរលំហែរកាយបាន ហើយនៅពេលក្តៅ អ្នកគួរតែស្នាក់នៅក្នុងបន្ទប់ ឬទទួលទានភេសជ្ជៈត្រជាក់ៗ ៕