មេដឹកនាំកូរ៉េខាងត្បូង និងវៀតណាម បានសន្យាធ្វើឲ្យកិច្ចសហប្រតិបត្តិការសេដ្ឋកិច្ចកាន់តែស៊ីជម្រៅ នៅថ្ងៃចន្ទ (ទី១១ ខែសីហា) ខណៈដែលប្រទេសដែលពឹងផ្អែកលើការនាំចេញរបស់ពួកលោក ព្យាយាមពង្រឹងខ្សែច្រវាក់ផ្គត់ផ្គង់ដ៏យូរអង្វែង ស្របពេលដែលពន្ធគយរបស់ប្រធានាធិបតីសហរដ្ឋអាមេរិក លោក Donald Trump ប៉ះពាល់ដល់ពាណិជ្ជកម្មពិភពលោក។

មិនមានការពិភាក្សាជាសាធារណៈ អំពីកាតព្វកិច្ចពន្ធនេះទេ ដោយកម្រិត ១៥ភាគរយលើផលិតផលកូរ៉េខាងត្បូង និង ២០ភាគរយ សម្រាប់ទំនិញវៀតណាម នាំចេញទៅសហរដ្ឋអាមេរិក ខណៈដែលប្រធានាធិបតីកូរ៉េខាងត្បូង លោក Lee Jae Myung បានធ្វើម្ចាស់ផ្ទះទទួលស្វាគមន៍មេដឹកនាំវៀតណាម លោក To Lam ដេលជាភ្ញៀវរដ្ឋដំបូងរបស់លោក ចាប់តាំងពីចូលកាន់តំណែង កាលពីខែមិថុនា។ 

ប៉ុន្តែវិធានការពន្ធរបស់លោក Trump លើផលិតផលពីបណ្តាប្រទេសអាស៊ីទាំង២ បានធ្វើឲ្យមានភាពមិនច្បាស់លាស់ខ្លាំងឡើងៗ ចំពោះការប្តេជ្ញាចិត្តផ្នែកអាជីវកម្ម នាពេលអនាគត ដោយទិន្នន័យផ្លូវការរបស់វៀតណាមបង្ហាញពីការធ្លាក់ចុះនៃការវិនិយោគថ្មី។

តែយ៉ាងណាក្ដី អគ្គលេខាបក្សកុម្មុយនីស្តវៀតណាម លោក Lam បាននិយាយថា ពួកលោកបានយល់ព្រមពង្រីកពាណិជ្ជកម្មជាមួយគ្នាទៅវិញទៅមកដល់ ១៥០ពាន់លានដុល្លារ នៅឆ្នាំ២០៣០ ពោលគឺឡើងពីប្រហែល ៨៦,៨ពាន់លានដុល្លារ ក្នុងឆ្នាំ២០២៤ ហើយថា វៀតណាមស្វាគមន៍ចំពោះការកើនឡើងនៃការវិនិយោគដោយក្រុមហ៊ុនកូរ៉េខាងត្បូង។ ចំណែកលោក Lee បានលើកឡើងក្នុងសុន្ទរកថាតាមទូរទស្សន៍ថា៖ «ប្រទេសរបស់យើងបានព្រមព្រៀងថា ក្រុមហ៊ុនកូរ៉េប្រហែល ១០.០០០ ដែលប្រតិបត្តិការនៅវៀតណាម បានរួមចំណែកដល់ការអភិវឌ្ឍសេដ្ឋកិច្ចរបស់វៀតណាម និងកិច្ចសហប្រតិបត្តិការដែលផ្ដល់ផលប្រយោជន៍ទៅវិញទៅមក រវាងប្រទេសទាំង២»។

ការិយាល័យរបស់លោក Lee បានឲ្យដឹងថា ប្រទេសទាំង២ បានចុះហត្ថលេខាលើអនុស្សរណៈនៃការយោគយល់គ្នាចំនួន ១០ ដោយសន្យាឲ្យមានកិច្ចសហប្រតិបត្តិការ លើវិស័យនានា ដែលក្នុងនោះរួមមានទាំងនុយក្លេអ៊ែរ និងថាមពលកកើតឡើងវិញ គោលនយោបាយរូបិយវត្ថុ និងហិរញ្ញវត្ថុ ព្រមទាំងវិទ្យាសាស្ត្រ និងបច្ចេកវិទ្យា៕