ទីភ្នាក់ងារសិទ្ធិមនុស្សរបស់អង្គការសហប្រជាជាតិ (UN) នៅថ្ងៃចន្ទ (ទី១១ ខែសីហា) បានថ្កោលទោសការកំណត់គោលដៅសម្លាប់អ្នកសារព័ត៌មាន ៦នាក់ នៅតំបន់ហ្កាហ្សា ពីសំណាក់អ៊ីស្រាអែល ដោយចាត់ទុកថា ជា «ការរំលោភបំពានយ៉ាងធ្ងន់ធ្ងរលើច្បាប់មនុស្សធម៌អន្តរជាតិ»។

ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស លោក Volker Turk បានលើកឡើងនៅលើបណ្ដាញសង្គម X ថា យោធាអ៊ីស្រាអែល កាលពីថ្ងៃអាទិត្យ (ទី១០ ខែសីហា) បានកំណត់គោលដៅលើតង់ ដែលជាជម្រកស្នាក់នៅរបស់បុគ្គលិក ៥នាក់ទៅពីទូរទស្សន៍ Al Jazeera របស់ប្រទេសកាតា។ ហើយអ្នកសារព័ត៌មានឯករាជ្យម្នាក់ក៏ត្រូវបានសម្លាប់ផងដែរ អំឡុងការវាយប្រហារដែលអ៊ីស្រាអែលបានទទួលស្គាល់ថា ជាប្រតិបត្តិការដែលបានគ្រោងទុក។

ការិយាល័យរបស់លោក Turk បានរៀបរាប់ថា «អ៊ីស្រាអែលត្រូវតែគោរព និងការពារជនស៊ីវិលទាំងអស់ ក្នុងនោះរួមទាំងអ្នកសារព័ត៌មានផងដែរ» ហើយបានកត់សម្គាល់ថា យ៉ាងហោចណាស់អ្នកសារព័ត៌មានប៉ាឡេស្ទីន ២៤២នាក់ ត្រូវបានសម្លាប់នៅតំបន់ហ្កាហ្សា ចាប់តាំងពីមានការវាយប្រហាររបស់ក្រុមហាម៉ាសលើអ៊ីស្រាអែល ជាហេតុការណ៍ដែលបានចាប់ផ្តើមបញ្ឆេះសង្រ្គាមនៅក្នុងដែនដីប៉ាឡេស្ទីន កាលពីខែតុលា ឆ្នាំ២០២៣។ ការិយាល័យនេះបានបន្ថែមថា៖ «យើងអំពាវនាវឲ្យមានការអនុញ្ញាតចូលទៅកាន់តំបន់ហ្កាហ្សាជាបន្ទាន់ សុវត្ថិភាព និងគ្មានការរារាំង សម្រាប់អ្នកសារព័ត៌មានទាំងអស់»។

យោធាអ៊ីស្រាអែលបានបញ្ជាក់ថា ខ្លួនបានកំណត់គោលដៅលើអ្នកសារព័ត៌មានដ៏លេចធ្លោម្នាក់ឈ្មោះ Anas al-Sharif ដែលខ្លួនបានតែងហៅហើយម្តងទៀតថា ជា «ភេរវករ» មានទំនាក់ទំនងជាមួយក្រុមហាម៉ាស ដោយនិយាយថា រូបគេ «បន្លំខ្លួនធ្វើជាអ្នកសារព័ត៌មាន។

ក្រុមអ្នកសារព័ត៌មានគ្មានព្រំដែន ដែលជាក្រុមសេរីភាពប្រព័ន្ធផ្សព្វផ្សាយ បានប្រាប់ថា ខ្លួន «ថ្កោលទោសយ៉ាងខ្លាំងក្លា និងដោយកំហឹង ចំពោះការសម្លាប់ដែលទទួលស្គាល់ដោយកងទ័ពអ៊ីស្រាអែល» លើលោក Al-Sharif និងអ្នកសារព័ត៌មានផ្សេងទៀត៕