​​វាយ​កូន​បាល់​៖ កីឡាករ​វាយ​កូន​បាល់​លេខ ១ ពិភពលោក ​Novak Djokovic ត្រូវបាន​និរទេស​ចេញពី​ប្រទេស​អូស្ត្រាលី ​បន្ទាប់ពី​ចាញ់ក្តី​តស៊ូ​ផ្លូវច្បាប់​ចុងក្រោយ​ដើម្បី​ស្នាក់នៅ​ក្នុងប្រទេស​។​ ​ចៅក្រម​បាន​ច្រាន​ចោលការ​ប្រឈម​ដែល​ចាប់ផ្តើម​ដោយ​តារា​វាយ​កូន​បាល់​ដែល​មិនបាន​ចាក់​វ៉ាក់សាំង បន្ទាប់ពី​រដ្ឋាភិបាល​បាន​លុបចោល​ទិដ្ឋាការ​រ​ចោល​លើ​ហេតុផល "​សុខភាព និង​សណ្តាប់ធ្នាប់​"​។​

​ក្តីសង្ឃឹម​របស់​កីឡាករ​លំដាប់​លេខ ១ ពិភពលោក​ក្នុងការ​ការពារ​ជើងឯក Australian Open ដើម្បី​ឈ្នះ​កំណត់ត្រា Grand Slam លើក​ទី២១ ក្នុង​អាជីព​នៅ​ទីក្រុង Melbourne ត្រូវបាន​បញ្ចប់​។​ Djokovic បាន​និយាយថា "​ខកចិត្ត​យ៉ាងខ្លាំង​" ប៉ុន្តែ​បានទទួល​យក​ការសម្រេច​នេះ​។​ ​នៅពេល​រៀបចំខ្លួន​ចាកចេញ ស្ថាប័ន​គ្រប់គ្រង​កីឡា​វាយ​កូន​បាល់​បុរស ATP បាន​និយាយថា សេចក្តីសម្រេច​របស់​តុលាការ​កាលពី​ថ្ងៃអាទិត្យ​បានបង្ហាញ​ពី​ការបញ្ចប់ "​ព្រឹត្តិការណ៍​ដ៏​គួរឱ្យ​សោកស្ដាយ​ជាខ្លាំង​"។​ ​នៅ​ព្រឹក​ថ្ងៃ​ដដែល អ្នកគាំទ្រ​របស់ Djokovic បាន​ស្ងប់ស្ងាត់​នៅ​ខាងក្រៅ​បន្ទប់​សវនាការ ខណៈដែល​ការសម្រេចចិត្ត​ត្រូវបាន​ប្រកាស​នៅមុន​ថ្ងៃ​ នៃ​ការប្រកួត​បើកឆាក​របស់គាត់​នៅក្នុង​ការប្រកួត​។ អ្នកគាំទ្រ​ម្នាក់​បាន​និយាយថា រដូវក្តៅ​របស់​នាង​ហាក់​គ្មាន​ន័យ​នៅពេល Australian Open ប្រកួត​ដោយ​គ្មាន​កីឡាករ​វ័យ ៣៤ឆ្នាំរូបនេះ​។​

​នាយករដ្ឋមន្ត្រី​អូស្ត្រាលីលោក Scott Morrison បាន​ស្វាគមន៍​ចំពោះ​សេចក្តីសំរេច​របស់​តុលាការ​ដោយ​ចាត់ទុកថា "​ការសម្រេច​ដ៏​ត្រឹមត្រូវ​ក្នុងន័យ​រក្សា​សុវត្ថិភាព សុខុមាលភាព​ប្រជាជន​អូស្ត្រាលី​"​។ ​សូមបញ្ជាក់ថា បើតាម​ការគ្រោងទុក Novak Djokovic ត្រូវ​ចាប់ផ្តើម​ប្រកួត​ជុំ​ទី ១ Australian Open ក្នុងនាម​ជា​អ្នកការពារ​ជើងឯក​នៅថ្ងៃនេះ ហើយ​នៅពេលនេះ​កៅអី​របស់ Djokovic ត្រូវបាន​ជំនួស​ដោយ​កីឡាករ​អ៊ីតាលី​លំដាប់​លេខ ១៥០ ពិភពលោក Salvatore Caruso៕

​អត្ថបទ​៖​នាង សុភា​វុ​ធ