នាយករដ្ឋមន្ត្រីអូស្ត្រាលី លោក Anthony Albanese បាននិយាយនៅថ្ងៃអង្គារ ទី១២ សីហានេះ ថា សមភាគីអ៊ីស្រាអែលរបស់លោកគឺលោក Benjamin Netanyahu បានបដិសេធអំពីស្ថានភាពមនុស្សធម៌នៅតំបន់ហ្កាហ្សា មួយថ្ងៃបន្ទាប់ពីការប្រកាសថា អូស្ត្រាលីនឹងទទួលស្គាល់រដ្ឋប៉ាឡេស្ទីនជាលើកដំបូង។ 

លោក Albanese បាននិយាយកាលពីថ្ងៃចន្ទសប្ដាហ៍នេះថា អូស្ត្រាលី នឹងទទួលស្គាល់រដ្ឋប៉ាឡេស្ទីន នៅឯមហាសន្និបាតអង្គការសហប្រជាជាតិនៅខែក្រោយ ជាវិធានការដែលបន្ថែមសម្ពាធអន្តរជាតិលើអ៊ីស្រាអែល បន្ទាប់ពីការប្រកាសស្រដៀងគ្នាពីប្រទេសបារាំង អង់គ្លេស និងកាណាដា។

លោក Albanese បាននិយាយនៅថ្ងៃអង្គារនេះថា ការស្ទាក់ស្ទើររបស់រដ្ឋាភិបាលលោក Netanyahu ក្នុងការស្តាប់សម្ព័ន្ធមិត្តរបស់ខ្លួន បានរួមចំណែកដល់ការសម្រេចចិត្តរបស់អូស្ត្រាលីក្នុងការទទួលស្គាល់រដ្ឋប៉ាឡេស្ទីន។ 

លោក Albanese បាននិយាយក្នុងបទសម្ភាសន៍ជាមួយទូរទស្សន៍រដ្ឋ ABC ដោយរំលឹកឡើងវិញពីជំនួបតាមទូរស័ព្ទកាលពីថ្ងៃព្រហស្បតិ៍ជាមួយលោក Netanyahu ដែលពិភាក្សាអំពីបញ្ហានេះថា លោក Netanyahu បានបដិសេធចំពោះផលវិបាកដែលកំពុងកើតឡើងសម្រាប់ប្រជាជនស្លូតត្រង់ ។ 

ការសម្រេចចិត្តរបស់អូស្ត្រាលីក្នុងការទទួលស្គាល់រដ្ឋប៉ាឡេស្ទីន គឺមានលក្ខខណ្ឌលើការប្តេជ្ញាចិត្តដែលទទួលបានពីអាជ្ញាធរប៉ាឡេស្ទីន រួមទាំងថាក្រុមសកម្មប្រយុទ្ធហាម៉ាស នឹងមិនមានការពាក់ព័ន្ធនៅក្នុងរដ្ឋណាមួយ នាពេលអនាគតឡើយ៕