អាជ្ញាធរបាននិយាយកាលពីថ្ងៃចន្ទ (១១ សីហា) ថា ឧប្បត្តិហេតុផ្ទុះជាច្រើនលើកនៅរោងចក្រផលិតដែកថែបរបស់សហរដ្ឋអាមេរិក ជិតទីក្រុង Pittsburgh នៃរដ្ឋ Pennsylvania បានសម្លាប់កម្មករ ២នាក់ និងបង្ករបួស ១០នាក់ផ្សេងទៀត ហើយក្រុមសង្គ្រោះបន្ទាន់នៅបន្តប្រតិបត្តិការស្វែងរក និងជួយសង្គ្រោះនៅទីតាំងនោះ។

ក្រុមហ៊ុន US Steel និងនគរបាលតំបន់ Allegheny បាននិយាយថា ដំបូងឡើយ មនុស្សម្នាក់បានស្លាប់ ហើយអ្នកស្លាប់ទីពីរ ដែលត្រូវរាយការណ៍ថាបាត់ខ្លួន បានរកឃើញបន្ទាប់ពី "កិច្ចខិតខំប្រឹងប្រែងស្វែងរក និងជួយសង្គ្រោះយ៉ាងទូលំទូលាយ" ដើម្បីកំណត់ទីតាំងសាកសព។

ការផ្ទុះនៅរោងចក្រ Clairton Coke Works ដែលគ្រប់គ្រងដោយក្រុមហ៊ុន US Steel នោះ ត្រូវរាយការណ៍ថាបានកើតឡើងមុនម៉ោងក្នុងស្រុក ១១ព្រឹក ហើយមិនទាន់មានការបញ្ជាក់ពីមូលហេតុដែលអាចបង្កឱ្យមានការផ្ទុះនេះនៅឡើយទេ។

លោក David Burritt ប្រធាន និងជានាយកប្រតិបត្តិក្រុមហ៊ុន US Steel បាននិយាយក្នុងសេចក្តីថ្លែងការណ៍មួយថា ក្រុមហ៊ុនកំពុងធ្វើការជាមួយអាជ្ញាធរក្នុងតំបន់ដើម្បីស្វែងរកមូលហេតុនៃគ្រោះថ្នាក់នេះ។ អភិបាលរដ្ឋ Pennsylvania លោក Josh Shapiro បានបង្ហោះលើបណ្ដាញសង្គម X ថា មានការផ្ទុះជាច្រើនដងនៅរោងចក្រនោះ ហើយមន្រ្តីរបស់លោកកំពុងទាក់ទងជាមួយមន្ត្រីមូលដ្ឋានលើរឿងនេះ៕