សហរដ្ឋអាមេរិក បានបង្កើនសម្ពាធលើកងទ័ពរំដោះបាឡូជីស្ថានដែលមានមូលដ្ឋាននៅប្រទេសប៉ាគីស្ថាន ដោយបានចាត់ទុកក្រុមនេះថាជាអង្គការភេរវកម្មបរទេស។ ការចាត់ទុកនេះ ត្រូវបានប្រកាសដោយក្រសួងការបរទេសកាលពីថ្ងៃចន្ទ ធ្វើឡើងបន្ទាប់ពីកងទ័ពរំដោះបាឡូជីស្ថាន(BLA) ដែលត្រូវបានគេស្គាល់ថាជាកងពលតូច Majeed ត្រូវបានគេចាត់ទុកថាជា «អង្គការភេរវកម្មពិភពលោកដែលត្រូវបានកំណត់ជាពិសេស» នៅក្នុងឆ្នាំ២០១៩។

ការកំណត់ថ្មីនេះ មានលក្ខណៈធ្ងន់ធ្ងរជាងមុន ហើយបានធ្វើឡើងខណៈប្រធានាធិបតីសហរដ្ឋអាមេរិក លោក Donald Trump បានព្យាយាមបង្កើនទំនាក់ទំនងជាមួយរដ្ឋាភិបាលប៉ាគីស្ថាន។ នៅក្នុងសេចក្តីថ្លែងការណ៍មួយ រដ្ឋមន្ត្រីការបរទេសអាមេរិក លោក Marco Rubio បាននិយាយថា ចំណាត់ការនេះ «បង្ហាញពីការប្តេជ្ញាចិត្តរបស់រដ្ឋបាល លោក Trump ក្នុងការប្រយុទ្ធប្រឆាំងអំពើភេរវកម្ម»។

សេចក្តីថ្លែងការណ៍បាននិយាយថា «ការកំណត់ភេរវករ មានតួនាទីយ៉ាងសំខាន់ក្នុងការប្រយុទ្ធប្រឆាំងនឹង មហន្តរាយ ហើយជាមធ្យោបាយដ៏មានប្រសិទ្ធភាពដើម្បីទប់ស្កាត់ការគាំទ្រសម្រាប់សកម្មភាពភេរវកម្ម»។

កងទ័ពរំដោះបាឡូជីស្ថាន(BLA) ត្រូវបានកំណត់ថាជាអង្គការភេរវកម្មពិភពលោកដែលត្រូវបានកំណត់ជាពិសេស បន្ទាប់ពីការវាយប្រហារជាបន្តបន្ទាប់ក្នុងឆ្នាំ២០១៩។ នៅក្នុងខែមីនាឆ្នាំនេះ ក្រុមអបគមន៍ បានអះអាងទទួលខុសត្រូវចំពោះការហ៊ុមព័ទ្ធរថភ្លើងដែលធ្វើដំណើរពីទីក្រុង Quetta ទៅទីក្រុង Peshawar ដែលក្នុងនោះអ្នកដំណើរ និងទាហានរាប់សិបនាក់ត្រូវបានសម្លាប់។ ការកំណត់ថ្មីនេះនឹងធ្វើឱ្យវាក្លាយជាឧក្រិដ្ឋកម្មសម្រាប់នរណាម្នាក់នៅក្នុងសហរដ្ឋអាមេរិកដែលផ្តល់ការគាំទ្រដល់ក្រុមនេះ ខណៈការកំណត់កាលពីពេលមុនបានដាក់គោលដៅតែលើធនធានហិរញ្ញវត្ថុប៉ុណ្ណោះ។ Balochistan គឺជាខេត្តធំបំផុត ប៉ុន្តែមានប្រជាជនតិចបំផុត និងក្រីក្របំផុតនៅក្នុងប្រទេសប៉ាគីស្ថាន។ តំបន់នេះបានជួបប្រទះការបះបោរអបគមន៍យ៉ាងហោចណាស់ប្រាំលើកចាប់តាំងពីការបង្កើតប្រទេសប៉ាគីស្ថានក្នុងឆ្នាំ១៩៤៧។