ក្រសួងការបរទេសបាននិយាយថា ការពិភាក្សារបស់ប្រទេសអ៊ីរ៉ង់ជាមួយទីភ្នាក់ងារថាមពលអាតូមិកអន្តរជាតិ (IAEA) នឹងមាន «លក្ខណៈបច្ចេកទេស» និង «ស្មុគស្មាញ» នៅមុនពេលដំណើរទស្សនកិច្ចរបស់អង្គការឃ្លាំមើលនុយក្លេអ៊ែររបស់អង្គការសហប្រជាជាតិជាលើកដំបូងចាប់តាំងពីទីក្រុងតេអេរ៉ង់ បានកាត់ផ្តាច់ទំនាក់ទំនងជាមួយទីភ្នាក់ងារនេះកាលពីខែមុន បន្ទាប់ពីជម្លោះកាលពីខែមិថុនាបង្កឡើងដោយការវាយប្រហាររបស់អ៊ីស្រាអែល។

លោក Esmaeil Baghaei អ្នកនាំពាក្យក្រសួងការបរទេសអ៊ីរ៉ង់ បានប្រាប់អ្នកសារព័ត៌មានកាលពីថ្ងៃចន្ទថា កិច្ចប្រជុំមួយអាចត្រូវបានរៀបចំជាមួយរដ្ឋមន្ត្រីក្រសួងការបរទេស លោក Abbas Araghchi ក្នុងអំឡុងពេលដំណើរទស្សនកិច្ចរបស់ទីភ្នាក់ងារ IAEA «ប៉ុន្តែវាឆាប់បន្តិចក្នុងការព្យាករថាតើកិច្ចពិភាក្សានឹងមានលទ្ធផលយ៉ាងណា ដោយសារទាំងនេះជាកិច្ចពិភាក្សាមានលក្ខណៈបច្ចេកទេស និងជាកិច្ចពិភាក្សាដ៏ស្មុគស្មាញ»។

ដំណើរទស្សនកិច្ចរបស់ទីភ្នាក់ងារ IAEA គឺជាដំណើរលើកដំបូងទៅកាន់ប្រទេសអ៊ីរ៉ង់ ចាប់តាំងពីប្រធានាធិបតី លោក ម៉ាស៊ូដ ប៉េហ្សេស្គីអាន(Masoud Pezeshkian) កាលពីថ្ងៃទី៣ ខែកក្កដា បានបញ្ជាឱ្យប្រទេសនេះផ្អាកកិច្ចសហប្រតិបត្តិការរបស់ខ្លួនជាមួយអង្គការឃ្លាំមើលនុយក្លេអ៊ែរ បន្ទាប់ពីសង្គ្រាមដ៏ខ្លាំងក្លាជាមួយអ៊ីស្រាអែលរយៈពេល១២ថ្ងៃ។ ជម្លោះ ក៏បានឃើញសហរដ្ឋអាមេរិកបើកការវាយប្រហារទ្រង់ទ្រាយធំទៅលើទីតាំងនុយក្លេអ៊ែរសំខាន់ៗរបស់អ៊ីរ៉ង់ ផងដែរ។

លោក Pezeshkian បាននិយាយទៅកាន់សារព័តត៌មាន Al Jazeera នៅក្នុងបទសម្ភាសន៍មួយថា ប្រទេសរបស់លោកបានត្រៀមសម្រាប់សង្រ្គាមនៅពេលអនាគតណាមួយដែលអ៊ីស្រាអែលអាចនឹងធ្វើប្រឆាំងអ៊ីរ៉ង់ ហើយលោកពុំមានសុទិដ្ឋិនិយមចំពោះបទឈប់បាញ់រវាងប្រទេសទាំងពីរនោះទេ។ លោកបានបញ្ជាក់ថា ទីក្រុងតេអេរ៉ង់ ប្តេជ្ញាបន្តកម្មវិធីនុយក្លេអ៊ែររបស់ខ្លួនក្នុងគោលបំណងដោយសន្តិវិធី។