កម្មវិធីស្បៀងអាហារពិភពលោក (WFP) បាននិយាយថា ខ្លួននឹងចាំបាច់ត្រូវកាត់បន្ថយយ៉ាងខ្លាំងនូវរបបអាហារដល់ជនភៀសខ្លួននៅក្នុងប្រទេសកេនយ៉ា ដោយសារតែការកាត់បន្ថយជំនួយជាសកល រួមទាំងការកាត់បន្ថយមូលនិធិសំខាន់ៗពីទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ(USAID)។

អ្នកស្រុកនៅជំរំជនភៀសខ្លួន Kakuma និងជំរំ Dadaab ចាប់ផ្តើមគិតពីផលប៉ះពាល់នៃការកាត់ជំនួយស្បៀងអាហារ ខណៈអង្គការWFP បានអនុវត្តប្រព័ន្ធជំនួយថ្មីនៅទីនោះ ដែលក្រុមមួយចំនួនត្រូវបានផ្តល់អាទិភាព។

អង្គការ WFP បាននិយាយថា ជំនួយកំពុងត្រូវបានកាត់បន្ថយចំនួន៦០ភាគរយសម្រាប់ក្រុមងាយរងគ្រោះបំផុត រួមមានស្ត្រីមានផ្ទៃពោះ និងជនពិការ និង៨០ភាគរយសម្រាប់ជនភៀសខ្លួនដែលមានប្រាក់ចំណូលមួយចំនួន។

យោងតាមឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) បានឱ្យដឹងថា ជំរំទាំងពីរនេះទទួលពលរដ្ឋជិត៨០០.០០០នាក់ ដែលភៀសខ្លួនចេញពីជម្លោះ និងគ្រោះរាំងស្ងួតនៅក្នុងប្រទេសសូម៉ាលី និងប្រទេសស៊ូដង់ខាងត្បូង។

លោក Baimankay Sankoh នាយករងប្រចាំប្រទេសរបស់អង្គការ WFP នៅប្រទេសកេនយ៉ាបាននិយាយថា «ប្រតិបត្តិការរបស់អង្គការ WFP គាំទ្រជនភៀសខ្លួននៅក្នុងប្រទេសកេនយ៉ា គឺស្ថិតនៅក្រោមភាពតានតឹងខ្លាំង»។ វានឹងធ្វើឲ្យប៉ះពាល់យ៉ាងធ្ងន់ធ្ងរដល់ជនភៀសខ្លួនងាយរងគ្រោះ ដោយបង្កើនហានិភ័យនៃភាពអត់ឃ្លាន និងកង្វះអាហារូបត្ថម្ភ។