​ប្រណាំង​រថយន្ត​៖ ​កីឡាករ​ប្រណាំង​រថយន្ត​ជើងចាស់​សញ្ជាតិ​កាតា Nasser Al-Attiyah បាន​គ្រង​ជើងឯក​ការប្រកួតប្រណាំង​យានយន្ត​ចំងាយ​ឆ្ងាយ Dakar Rally ជា​លើក​ទី ៤ ក្នុង​អាជីព​ ស្របពេល​ផ្នែក​ម៉ូតូ​បាន​ទៅ​កីឡាករ​អង់គ្លេស Sam Sunderland ជា​លើក​ទី ២ ក្នុង​អាជីព​ផងដែរ​។

​​ដំណាក់កាល​ទី ១២ ចុងក្រោយ​ដែលមាន​ចំងាយ​ផ្លូវ ១៦៤គីឡូម៉ែត្រ​បញ្ចប់​នៅ​រដ្ឋធានី Jeddah ប្រទេស​អារ៉ាប៊ីសាអ៊ូឌីត​នោះ​កីឡាករ​អាហ្វ្រិក​ខាងត្បូង Henk Lategan គឺជា​អ្នកឈ្នះ​ក្រោយមក​ដល់ទី​ព្រ័ត្រ​មុនគេ ១ម៉ោង ៣៥នាទី ១៩វិនាទី​តាម​ពីក្រោយ​ដោយ​កីឡាករ​បារាំង Stephane Peterhansel និង​លេខ ៣ កីឡាករ​អាហ្វ្រិក​ខាងត្បូង​មួយរូប​ទៀត Brian Baragwanath​។ ​ក្រោយ ១២ដំណាក់កាល​នេះ​កីឡាករ​វ័យ ៥១ឆ្នាំ​បើកបរ​រថយន្ត​តូយ៉ូតា Nasser Al-Attiyah បាន​ប្រើប្រាស់​ពេល​សរុប ៣៨ម៉ោង ៣៣នាទី ៣វិនាទី​ដែល​ថេរវេលា​នេះ​គឺ​យកឈ្នះ​អ្នក​លេខ ២ កីឡាករ​បារាំង​ជើងឯក​ពិភពលោក​ប្រណាំងរថយន្ត Rally, Sebastien Loeb ដល់​ទៅ ២៧នាទី ៤៦វិនាទី ខណៈ​អ្នក​លេខ ៣ បាន​ទៅ​កីឡាករ​ម្ចាស់ផ្ទះ​អារ៉ាប៊ីសាអ៊ូឌីត Yazeed Al-Rajhi​។ ​ចំណែក​ផ្នែក​ម៉ូតូ​ដំណាក់កាល​ចុងក្រោយ​អ្នកឈ្នះ​គឺ​កីឡាករ​ឈី​លី Pablo Quintanilla តែ​ជារួម Sam Sunderland ជា​ជើងឯក​ដោយមាន​វេលា​សរុប​ល្អ​ជាង​កីឡាករ​ឈីលី​រូបនេះ ៣នាទី ២៧វិនាទី​៕

​អត្ថបទ​៖​នាង សុភា​វុ​ធ