ក្រុមសកម្មជនក្នុងតំបន់ បាននិយាយថា កងកម្លាំងយោធាប៉ារ៉ាគាំទ្ររហ័សរបស់ប្រទេសស៊ូដង់ (RSF) បានសម្លាប់ជនស៊ីវិលជាង ៤០នាក់ និងរាប់សិបនាក់រងរបួស នៅក្នុងការវាយប្រហារលើជំរំភៀសខ្លួន នៅទីក្រុង El Fasher ភាគខាងជើងតំបន់ Darfur កាលពីថ្ងៃចន្ទ។

គណៈកម្មាធិការតស៊ូនៃទីក្រុង El Fasher ដែលជាក្រុមសកម្មជនប្រឆាំងសង្គ្រាម បាននិយាយនៅក្នុង    សេចក្តីថ្លែងការណ៍មួយថា ការវាយប្រហារលើជំរំ Abu Shouk រួមមានការបាញ់ផ្លោង និងការប្រហារជីវិតមនុស្ស នៅក្នុងផ្ទះរបស់ពួកគេ។ ក្រុមអ្នកស្ម័គ្រចិត្តមួយក្រុមទៀត គឺបន្ទប់សង្គ្រោះបន្ទាន់ Abu Shouk Camp បានរាយការណ៍ថា មានអ្នកស្លាប់យ៉ាងតិច ៤០នាក់ និងរបួស ១៩នាក់។

ការវាយប្រហារនេះ បានកើតឡើង នៅពេលដែលកងកម្លាំងប្រដាប់អាវុធស៊ូដង់ (SAF) និងក្រុមសម្ព័ន្ធមិត្ត បាននិយាយថា ពួកគេបានវាយបកទៅលើការវាយប្រហារដ៏ច្រើនសន្ធឹកសន្ធាប់ដោយកងយោធាប៉ារ៉ាគំាទ្ររហ័ស (RSF) ទៅលើទីក្រុងនេះ។ កងទ័ព និងសម្ព័ន្ធមិត្ត បានអះអាងថា បានធ្វើឲ្យកងកម្លាំង RSF ខាតបង់យ៉ាងធ្ងន់ធ្ងរ ដោយបានសម្លាប់ប្រយុទ្ធជនជាង ២០០នាក់ និងបំផ្លាញ ឬចាប់យកយានប្រយុទ្ធរាប់សិបគ្រឿង។

អ្នកស្រុកបាននិយាយថា ការប្រយុទ្ធគ្នា បានចាប់ផ្តើមកាលពីព្រឹកថ្ងៃចន្ទ ដោយកងកម្លាំង RSF បានបាញ់ផ្លោងយ៉ាងខ្លាំងក្លា នៅក្នុងតំបន់ជាច្រើន ក្នុងនោះមានទីបញ្ជាការកងទ័ព និងជំរំ Abu Shouk មុនពេលការវាយលុកជើងគោក បានចាប់ផ្តើមពីភាគខាងកើត ភាគអាគ្នេយ៍ និងភាគខាងជើងរបស់ទីក្រុងនេះ។

ភ្លាមៗនោះ កងកម្លាំងយោធាប៉ារ៉ាគាំទ្ររហ័ស (RSF) មិនបានធ្វើអត្ថាធិប្បាយអំពីការចោទប្រកាន់នេះទេ។