ការិយាល័យសម្របសម្រួលកិច្ចការមនុស្សធម៌ (OCHA) របស់អង្គការសហប្រជាជាតិ បានរាយការណ៍ថា ស្ថានភាពមនុស្សធម៌ នៅតំបន់ហ្កាហ្សាស្ទ្រីប គឺធ្ងន់ធ្ងរ ដោយកុមារ ៣៧នាក់ បានស្លាប់ ដោយសារកង្វះអាហារូបត្ថម្ភ នៅក្នុងទឹកដី ចាប់តាំងពីថ្ងៃទី ០១ ខែកក្កដាមក។

យោងតាមអ្នកនាំពាក្យរបស់ទីភ្នាក់ងារលោក Ramesh Rajasingham «លក្ខខណ្ឌមនុស្សធម៌ គឺហួសពីការភ័យរន្ធត់ទៅហើយ»។ លោកបាននិយាយនៅក្នុងសុន្ទរកថានៅឯកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិថា៖«និយាយដោយស្មោះទៅ យើងអស់មានពាក្យអ្វី ដើម្បីពិពណ៌នាអំពីស្ថានភាពតទៀតហើយ»។

លោក Rajasingham បានសង្កត់ធ្ងន់ថា ចំនួនអ្នកស្លាប់ដោយសារការអត់ឃ្លានកំ ពុងកើនឡើង ជាពិសេសក្នុងចំណោមកុមារ ដែលមានកង្វះអាហារូបត្ថម្ភធ្ងន់ធ្ងរ។ អ្នកនាំពាក្យ OCHA បាននិយាយថា៖«ចាប់តាំងពីការកើនឡើងនៃអរិភាព ក្នុងខែតុលា ឆ្នាំ ២០២៣ អាជ្ញាធរសុខាភិបាលនៅតំបន់ហ្កាហ្សា បានកត់ត្រាការស្លាប់របស់កុមារចំនួន ៩៨នាក់ ដោយសារកង្វះអាហារូបត្ថម្ភធ្ងន់ធ្ងរ ចំណែកកុមារចំនួន ៣៧ នាក់ គិតចាប់តាំងពីថ្ងៃទី ០១ ខែកក្កដា គឺទើបតែជាងមួយខែមុន។ ដូច្នេះ នេះមិនមែនជាវិបត្តិអត់ឃ្លានដែលកំពុងកើតឡើងទៀតទេ នេះគឺជាភាពអត់ឃ្លានសុទ្ធសាធ និងជាក់ស្តែង»។

យោងតាមព័ត៌មានរបស់លោក មនុស្សជាង ៦១.០០០នាក់ បានស្លាប់នៅតំបន់ហ្កាហ្សាស្ទ្រីប ចាប់តាំងពីខែតុលា ឆ្នាំ ២០២៣ ក្នុងនោះមានកុមារយ៉ាងហោចណាស់ ១៨.000នាក់។ ក្នុងចំណោមអ្នកស្លាប់មាន «បុគ្គលិកមនុស្សធម៌ជាង ៥០០នាក់ ត្រូវបានសម្លាប់នៅតំបន់ហ្កាហ្សា ចាប់តាំងពីអរិភាព បានកើនឡើង ក្នុងនោះមានស្ត្រីយ៉ាងហោចណាស់ ១៦៧នាក់»។ ប្រជាជនប៉ាឡេស្ទីនរាប់ពាន់នាក់ រួមទាំងស្ត្រី និងកុមារ នៅតែស្ថិតក្នុងពន្ធនាគាររបស់អ៊ីស្រាអែល។ មន្ត្រី OCHA បានកត់សម្គាល់ថា៖«មនុស្សជាច្រើន ត្រូវបានឃុំខ្លួនដោយគ្មានការចោទប្រកាន់ ឬការកាត់ទោស ឬការការពារដែលត្រូវការជាចំបាច់នោះ»។