ប្រធានាធិបតីប្រេស៊ីល លោក Luiz Inacio Lula da Silva និងប្រធានាធិបតីចិន លោក Xi Jinping បានពិភាក្សាពីតួនាទីរបស់ក្រុមរដ្ឋ BRICS និងធុរកិច្ចទ្វេភាគីតាមរយៈកិច្ចសន្ទនាតាមទូរសព្ទមួយ នេះបើយោងតាមការិយាល័យរបស់ Lula និងប្រព័ន្ធផ្សព្វផ្សាយរដ្ឋរបស់ចិន បាននិយាយនៅថ្ងៃអង្គារ (១២ សីហា) នេះ។

ការិយាល័យប្រធានាធិបតីប្រេស៊ីល បាននិយាយក្នុងសេចក្តីថ្លែងការណ៍មួយថា "មេដឹកនាំទាំងពីរបានពិភាក្សាអស់ពេល ១ម៉ោងកាលពីថ្ងៃចន្ទ ដោយយល់ស្របលើតួនាទីរបស់ក្រុម G20 និង BRICS ក្នុងការការពារពហុភាគីនិយម”។ សេចក្តីថ្លែងការណ៍បន្តថា "ប្រធានាធិបតីទាំងពីរក៏បានលើកឡើងពីឆន្ទៈក្នុងការបន្តកំណត់ឱកាសអាជីវកម្មថ្មីរវាងសេដ្ឋកិច្ចទាំងពីរផងដែរ"។

ប្រព័ន្ធផ្សព្វផ្សាយរដ្ឋស៊ីនហួ របស់ចិន រាយការណ៍ថា លោក Xi បានហៅក្រុម BRICS ថាជាវេទិកាដ៏សំខាន់មួយសម្រាប់កសាងការឯកភាពគ្នានៅក្នុងពិភពសកលខាងត្បូង ហើយបានលើកឡើងថា ចិន ត្រៀមខ្លួនជាស្រេចក្នុងការធ្វើការជាមួយប្រេស៊ីល ដើម្បីធ្វើជាគំរូនៃភាពរួបរួម និងការពឹងផ្អែកលើខ្លួនឯង ក្នុងចំណោមប្រទេសធំៗនៅសកលខាងត្បូង។

ស៊ីនហួបន្ថែមថា លោក Xi បានពណ៌នាទំនាក់ទំនងរវាងប្រទេសទាំងពីរថា "ល្អបំផុតក្នុងប្រវត្តិសាស្ត្រ" ហើយនិយាយថា ភាគីទាំងពីរគួរតែធ្វើការរួមគ្នាដើម្បីដោះស្រាយបញ្ហាប្រឈមជាសកល និងលើកកម្ពស់ការដោះស្រាយនយោបាយនៃវិបត្តិអ៊ុយក្រែនផងដែរ។ សូមបញ្ជាក់ជូនថា លោក Lula ធ្លាប់និយាយរួចហើយកាលពីសប្តាហ៍មុនថា លោកនឹងបើកកិច្ចសន្ទនាអំពីរបៀបដោះស្រាយពន្ធរបស់សហរដ្ឋអាមេរិក ជាមួយមេដឹកនាំប្រទេស BRICS៕