យោធាលីទុយអានី បានប្រកាសថា ប្រទេសលីទុយអានី — ដែលជាសមាជិករបស់អង្គការណាតូ និងសហភាពអឺរ៉ុប ហើយមានព្រំប្រទល់ជាប់ទាំងបេឡារុស និងតំបន់ Kaliningrad របស់រុស្ស៊ី— បានចាប់ផ្ដើមធ្វើសមយុទ្ធយោធាឈ្មោះថា ចចកកំណាច ឆ្នាំ២០២៥ ឬជាភាសាក្នុងស្រុកថា Arsus Vilkas 2025 ចន្លោះពីថ្ងៃទី១១ ដល់ថ្ងៃទី២២ ខែសីហា នៅតំបន់ក្បែរព្រំដែនជាមួយប្រទេសបេឡារុស។

សមយុទ្ធនេះកើតឡើងប៉ុន្មានថ្ងៃប៉ុណ្ណោះបន្ទាប់ពីកងទាហាន និងគ្រឿងបរិក្ខារក្រុមដំបូងបង្អស់របស់រុស្ស៊ី បានទៅដល់ប្រទេសបេឡារុស សម្រាប់ផែនការសមយុទ្ធឈ្មោះថា Zapad ឆ្នាំ២០២៥ ទ្រង់ទ្រាយធំរវាងសម្ព័ន្ធមិត្តទាំងពីរ ដែលគ្រោងធ្វើនៅពាក់កណ្តាលខែកញ្ញា។ អ៊ុយក្រែន និងសម្ព័ន្ធយោធាណាតូ បានសម្តែងក្ដីបារម្ភថា សមយុទ្ធ Zapad នោះអាចត្រូវបានប្រើប្រាស់ជាការលាក់បាំងនៃប្រតិបត្តិការយោធាថ្មីរបស់រុស្ស៊ី ខណៈទីក្រុងមូស្គូ បន្តធ្វើសង្គ្រាមរបស់ខ្លួននៅអ៊ុយក្រែន។

សមយុទ្ធលីទុយអានីនេះមានការចូលរួមពីបុគ្គលិកប្រហែល ៣៥០នាក់ និងយុទ្ធោបករណ៍ ៥០គ្រឿង ជាមួយនឹងការហ្វឹកហ្វឺននិម្មិតបាញ់គ្រាប់រំសេវ។ យោធានិយាថា សប្តាហ៍ដំបូងនឹងមើលឃើញក្រុមថ្មើរជើង និងទីបញ្ជាការកងវរសេនាតូចលីទុយអានី ដាក់ពង្រាយទៅកាន់ស្រុក Varena ភាគខាងត្បូង សម្រាប់ប្រតិបត្តិការការពារនៅក្នុងតំបន់ដែលមានប្រជាជនច្រើន ដោយប្រើប្រាស់យានប្រយុទ្ធរបស់ថ្មើរជើងឈ្មោះ Vilkas។

យោធាបន្តថា នៅសប្តាហ៍ទីពីរ សមយុទ្ធនេះនឹងផ្តោតលើលំហាត់សមបាញ់គ្រាប់ពិតកម្រិតអង្គភាពយោធា នៅទីតាំងហ្វឹកហាត់ Gaiziunai កណ្តាលប្រទេសលីទុយអានី៕