ចិន៖ ទីក្រុង Xi'an ភាគកណ្ដាលរបស់ប្រទេសចិនបានចាប់ផ្តើមដកចេញវិធានការរឹតត្បិតវីរុស COVID-19 ជាបណ្ដើរៗបន្ទាប់ពីទីក្រុងនេះបានចូលទៅក្នុងការបិទខ្ទប់កាលពី ៣សប្តាហ៍មុនដើម្បីទប់ស្កាត់ការផ្ទុះឡើងវីរុស។ ប្រព័ន្ធផ្សព្វផ្សាយរដ្ឋ CCTV បានរាយការណ៍កាលពីថ្ងៃអាទិត្យថា សកម្មភាព ផលិតកម្មមួយចំនួនបានចាប់ផ្តើមឡើងវិញនៅក្នុងទីក្រុង។
ក្រុមមន្ត្រីបាននិយាយនៅក្នុងសន្និសីទសារព័ត៌មានថា វិធានការបិទខ្ទប់ត្រូវបានដកចេញដោយផ្នែក ឬទាំងស្រុងនៅក្នុងសហគមន៍មួយចំនួនដែលត្រូវបានកំណត់ថាមានហានិភ័យទាប ដែលអនុញ្ញាតឱ្យប្រជាជនចាកចេញពីលំនៅឋានរបស់ពួកគេ ក្នុងរយៈពេលកំណត់ដើម្បីទិញរបស់របរប្រើប្រាស់ប្រចាំថ្ងៃ។ មន្ត្រីសុខាភិបាលជាន់ខ្ពស់របស់ទីក្រុងបាននិយាយថា ករណីវីរុស COVID-19 ក្នុងរយៈពេល ៥ថ្ងៃចុងក្រោយនេះ ត្រូវបានរកឃើញតែក្នុងចំណោមអ្នកកំពុងស្ថិតនៅក្នុងការធ្វើចត្តាឡីស័ក។ ទីក្រុងនេះបានចូលទៅក្នុងការបិទខ្ទប់តឹងរ៉ឹងកាលពីថ្ងៃទី២២ ខែធ្នូ បន្ទាប់ពីការផ្ទុះឡើងនៃវីរុសឆ្លងដែលក្រុមមន្ត្រីសន្មតថាជាវីរុសបម្លែងខ្លួនថ្មី Delta។ ប្រទេសចិនកំពុងស្វែងរកការលុបបំបាត់ករណីឆ្លងក្នុងតំបន់នៃវីរុសបម្លែងខ្លួនថ្មី Omicron និង Delta ជាមួយនឹងគោលការណ៍គ្មានវីរុស COVID-19 របស់ខ្លួន។
ទីក្រុង និងតំបន់ជាច្រើននៅក្នុងខេត្ត Guangdong ភាគខាងត្បូង ក៏ដូចជាទីក្រុងប៉េកាំងក្នុងរយៈពេលប៉ុន្មានថ្ងៃថ្មីៗនេះ បានរាយការណ៍ករណីឆ្លងក្នុងស្រុកនៃវីរុសបម្លែងខ្លួនថ្មី Omicron ដែលឆ្លងខ្ពស់។ យោងតាមប្រព័ន្ធផ្សព្វផ្សាយរដ្ឋបានឱ្យដឹងថា ទីក្រុងប៉េកាំងបានរាយការណ៍ពីករណីឆ្លងវីរុសបម្លែងខ្លួនថ្មី Omicron ក្នុងស្រុកដំបូងរបស់ខ្លួនកាលពីថ្ងៃសៅរ៍ មុនពេលដែលទីក្រុងនេះធ្វើជាម្ចាស់ផ្ទះព្រឹត្តិការណ៍កីឡាអូឡាំពិកដែលនឹងចាប់ផ្តើមនៅថ្ងៃទី៤ ខែកុម្ភៈ និងប្រមាណ ២សប្តាហ៍មុនពេលចាប់ផ្តើមការប្រារព្ធពិធីបុណ្យចូលឆ្នាំថ្មី៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
