អ៊ីរ៉ង់បានបង្កើនការព្រមានដល់ប្រទេសអាមេនី កាលពីថ្ងៃចន្ទ (ទី១១ ខែសីហា) ពាក់ព័ន្ធនឹងការគ្រោងទុកបង្កើតច្រករបៀងគាំទ្រដោយសហរដ្ឋអាមេរិក ដែលតភ្ជាប់អាស៊ែបៃហ្សង់ទៅដែនដី នៅជិតព្រំដែនអ៊ីរ៉ង់ ដោយនេះជាផ្នែកនៃកិច្ចព្រមព្រៀងសន្តិភាព នាពេលថ្មីៗនេះ រវាងទីក្រុង Yerevan (យ៉េរ៉េវ៉ាន់) និង Baku (បាគូ)។

បើយោងតាមសេចក្តីថ្លែងការណ៍ពីទីក្រុងតេអេរ៉ង់ បានឲ្យដឹងថា អំឡុងការសន្ទនាតាមទូរសព្ទជាមួយនាយករដ្ឋមន្ត្រីអាមេនី លោក Nikol Pashinyan ប្រធានាធិបតីអ៊ីរ៉ង់ លោក Masoud Pezeshkian «បានរំលឹកអំពីលទ្ធភាពនៃការមានវិធានការដោយសហរដ្ឋអាមេរិក ដែលអាចបន្តអនុវត្តគោលដៅអនុត្តរភាព នៅក្នុងតំបន់កូកាស ក្រោមរូបភាពនៃការវិនិយោគសេដ្ឋកិច្ច និងការធានាសន្តិភាព»។

ច្រករបៀងដីគោក ដែលត្រូវបានគេឲ្យឈ្មោះថា «ផ្លូវ Trump ដើម្បីសន្តិភាព និងវិបុលភាពអន្តរជាតិ» គឺជាផ្នែកមួយនៃកិច្ចព្រមព្រៀង ដែលត្រូវបានចុះហត្ថលេខា កាលពីសប្តាហ៍មុន នៅទីក្រុងវ៉ាស៊ីនតោន រវាងអាមេនី និងអាស៊ែបៃហ្សង់។ នៅក្រោមកិច្ចព្រមព្រៀងនេះ សហរដ្ឋអាមេរិក នឹងមានសិទ្ធិអភិវឌ្ឍន៍លើផ្លូវដែលបានស្នើឡើង តភ្ជាប់អាស៊ែបៃហ្សង់ទៅកាន់តំបន់ Nakhichevan របស់ប្រទេសនេះ ដោយឆ្លងកាត់តំបន់នៅជិតព្រំដែនអ៊ីរ៉ង់។

អ៊ីរ៉ង់បានប្រឆាំងនឹងគម្រោងបង្កើតផ្លូវឆ្លងកាត់ជាយូរមកហើយ ដែលត្រូវបានគេស្គាល់ថា ជាច្រករបៀង Zangezur ដោយភ័យខ្លាចថា វានឹងកាត់ផ្តាច់ប្រទេសចេញពីប្រទេសអាមេនី និងតំបន់កូកាសផ្សេងទៀត ហើយនាំកងកម្លាំងបរទេសដែលមានអរិភាពមកក្បែរព្រំដែនរបស់ខ្លួន៕