លោកមហាសេដ្ឋី Elon Musk កាលពីថ្ងៃចន្ទ (ទី១១ ខែសីហា) បាននិយាយថា ក្រុមហ៊ុនបញ្ញាសិប្បនិម្មិត xAI របស់លោក នឹងចាត់វិធានការផ្លូវច្បាប់ ប្រឆាំងនឹងក្រុមហ៊ុន Apple ដោយចោទប្រកាន់ក្រុមហ៊ុនផលិតទូរសព្ទ iPhone ពីបទបំពានលើច្បាប់ប្រឆាំងទំនុកចិត្ត ក្នុងការគ្រប់គ្រងការចាត់ចំណាត់ថ្នាក់ នៅក្នុងកម្មវិធី App Store។

តាមរយៈការបង្ហោះនៅលើបណ្ដាញសង្គម X របស់លោក លោក Musk បានប្រាប់ថា៖ «ក្រុមហ៊ុន Apple កំពុងមានឥរិយាបទដែលធ្វើឲ្យវាមិនអាចទៅរួចនោះឡើយ សម្រាប់ក្រុមហ៊ុន AI (បញ្ញាសិប្បនិម្មិត) ផ្សេងទៀត ក្រៅពី OpenAI អាចឡើងទៅឈរចំណាត់ថ្នាក់លេខ១ នៅក្នុងកម្មវិធី App Store ដែលជាការរំលោភលើទំនុកចិត្តមិនអាចប្រកែកបាន។ ក្រុមហ៊ុន xAI នឹងចាត់វិធានការផ្លូវច្បាប់ជាបន្ទាន់»។

តែយ៉ាងណាក្ដី លោក Musk មិនបានផ្តល់ភស្តុតាង ដើម្បីគាំទ្រការអះអាងរបស់លោកឡើយ។ ហើយក្រុមហ៊ុន Apple, OpenAI, និង xAI ក៏មិនបានឆ្លើយតបភ្លាមៗនោះដែរ ចំពោះសំណើសុំការអត្ថាធិប្បាយរបស់សារព័ត៌មាន Reuters។

បច្ចុប្បន្ន កម្មវិធី ChatGPT កាន់កាប់ទីតាំងលើគេបង្អស់ នៅក្នុង «អេបឥតគិតថ្លៃទី១» របស់កម្មវិធី App Store សម្រាប់ទូរសព្ទ iPhone នៅសហរដ្ឋអាមេរិក ខណៈដែលកម្មវិធី Grok របស់ក្រុមហ៊ុន xAI ជាប់ចំណាត់ថ្នាក់ទី៥ និងហើយកម្មវិធី Gemini របស់ក្រុមហ៊ុន Google ស្ថិតនៅលំដាប់ទី៥៧៕