​បាល់ទាត់៖ ​ក្លិប​ Tottenham Hotspur មានការ​ភ្ញាក់ផ្អើល​ខ្លាំង​នៅពេល English Premier League សំរេច​លើក​ការប្រកួត​តាម​សំណើ​របស់ Arsenal យប់មិញ​។ ​ក្រុម​កាំភ្លើង​ធំ Arsenal បានស្នើ​សុំ​លើក​ការប្រកួត​នៅ​ទឹកដី Spurs យប់​ថ្ងៃអាទិត្យ​ម្សិលមិញ​នេះដោយសារ​មិនមាន​កីឡាករ​គ្រប់គ្រាន់​។

​​ច្បាប់​របស់ EPL ក្នុង​បរិបទ​កូ​វីដ​នេះ​បាន​ចែងថា ​ក្លិប​បាល់ទាត់​ណាមួយ​អាច​សុំ​លើក​ការប្រកួត​បាន ​ប្រសិនបើ​ពួកគេ​មិនមាន​កីឡាករ​គ្រប់គ្រាន់​យ៉ាងតិច ១៣​នាក់​ទាំង​អ្នកចាំទី​។ ​Spurs បាន​ចេញ​សេចក្តី​ថ្លែង​ការ​មិន​ពេញ​ចិត្តនឹង​ការ​សំរេចចិត្ត​នេះ ដោយសារ​កូ​វីដ​-១៩ មិន​មែន​ជា​កត្តា​ចម្បង​ដែល​ធ្វើ​ឱ្យ Arsenal មិន​មាន​កីឡាករ​គ្រប់គ្រាន់​នោះទេ​គឺ​បញ្ហា​របួស និង​កីឡាករ​មាន​ភារកិច្ច​នៅ​ពានរង្វាន់​បាល់ទាត់​ទ្វីប​អាហ្វ្រិក Africa Cup of Nations​។ ​​ត្រង់​ចំនុច​នេះ​អតីត​ខ្សែ​ការពារ Manchester United, Gary Neville ដែល​បច្ចុប្បន្ន​ជា​អ្នកវិភាគ​កីឡាបាល់ទាត់​ជំនាញ​មួយរូប​បាន​និយាយថា EPL គួរតែ​កែសម្រួល​ច្បាប់​នេះ​ដោយ​មិនគួរ​យក​កត្តា​ផ្សេងៗ​មិនមែន​កូ​វីដ​-១៩ មក​ធ្វើឱ្យ​ការប្រកួត​មួយ​អាច​លើក​ពេល​បានឡើយ ពោលគឺ​នៅពេលនេះ​ក្លិប​ហ៊ាន​ស្នើសុំ​លើក​ពេល​ ដោយសារ​ពួកគេ​មិនមាន​កីឡាករ​សំខាន់ៗ​ទៅវិញ​ទេ មិនមែន​ដោយ​សារ​ឆ្លង​កូ​វីដ​-១៩ ឡើយ​។

​​សូមបញ្ជាក់ថា Arsenal មាន​កីឡាករ ៤នាក់​ជាប់​ភារកិច្ច​នៅ Africa Cup of Nations រួមមាន Pierre-Emerick Aubameyang, Nicolas Pepe, Mohamed Elneny និង Thomas Partey ស្រប​ពេលដែល Cedric Soares, Bukayo Saka និង Calum Chambers មាន​របួស បូករួម​ទាំង Granit Xhaka ជាប់​ពិន័យ និង Martin Odegaard មាន​ជំងឺ​៕

​អត្ថបទ​៖​នាង សុភា​វុ​ធ