សមាជិកសភានូវែលសេឡង់លោកស្រី Chloe Swarbrick ត្រូវបានបញ្ជាឲ្យចាកចេញពីសភា នៅថ្ងៃអង្គារនេះ ក្នុងអំឡុងពេលការជជែកដេញដោលយ៉ាងក្តៅគគុក ជុំវិញការឆ្លើយតបរបស់រដ្ឋាភិបាល ចំពោះប៉ាឡេស្ទីន។

ការជជែកដេញដោលជាបន្ទាន់មួយ ត្រូវបានធ្វើឡើង បន្ទាប់ពីរដ្ឋាភិបាលកណ្តាលស្តាំនិយម បាននិយាយកាលពីថ្ងៃចន្ទថា ខ្លួនកំពុងថ្លឹងថ្លែងជំហររបស់ខ្លួនថាតើត្រូវទទួលស្គាល់រដ្ឋប៉ាឡេស្ទីនដែរឬទេ។

ប្រទេសអូស្ត្រាលីដែលជាសម្ព័ន្ធមិត្តជិតស្និទ្ធកាលពីថ្ងៃចន្ទ បានចូលរួមជាមួយកាណាដា ចក្រភពអង់គ្លេស និងបារាំង ក្នុងការប្រកាសថា ខ្លួននឹងទទួលស្គាល់រដ្ឋប៉ាឡេស្ទីន នៅក្នុងសន្និសីទអង្គការសហប្រជាជាតិក្នុងខែកញ្ញា។

លោក Swarbrick ដែលជាសហមេដឹកនាំគណបក្សបៃតង បាននិយាយថា នូវែលសេឡង់ គឺជា«ភាពយឺតយ៉ាវ» និង «ហួសហេតុ» ហើយការខ្វះខាតនៃការសម្រេចចិត្ត គឺគួរឲ្យភ័យខ្លាច មុនពេលអំពាវនាវដល់សមាជិករដ្ឋាភិបាលមួយចំនួនឲ្យគាំទ្រសេចក្តីព្រាងច្បាប់មួយ ដើម្បី «ដាក់ទណ្ឌកម្មអ៊ីស្រាអែលចំពោះ ឧក្រិដ្ឋកម្មសង្គ្រាម» ។ ច្បាប់នេះ ត្រូវបានគណបក្សរបស់លោកស្រីស្នើឡើង ក្នុងខែមីនា ហើយត្រូវបានគាំទ្រដោយគណបក្សប្រឆាំងទាំងអស់។