ភ្នំពេញ៖ កម្ពុជានឹងមានរោងចក្រផលិតសំបកកង់រថយន្ត និងរោងចក្រដែលប្រើប្រាស់វត្ថុធាតុដើមចេញពីកៅស៊ូ មានជាច្រើនទៀត ដែលយើងអាចរំពឹងថា នឹងស្រូបយកសក្តានុពលជ័រកៅស៊ូក្នុងស្រុក សម្រាប់បម្រើផ្គត់ផ្គង់ខ្សែច្រវ៉ាក់ផលិតកម្មកាន់តែច្រើន។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានថ្លែងលើកឡើងថា ចំពោះសមិទ្ធផលដែលមាននាពេលកន្លងមក ក៏ដូចបច្ចុប្បន្ន គឺបានកើតចេញក្រោមការខិតខំប្រឹងប្រែងរបស់រាជរដ្ឋាភិបាល ក្នុងការទាកទាញអ្នកវិនិយោគ និងការផ្តល់ លក្ខណៈ អំណោយផលគ្រប់បែបយ៉ាង ជាពិសេសការលើកកម្ពស់ដល់អ្នកវិនិយោគ ដែលកំពុងដំណើរការខ្សែច្រវ៉ាក់ផលិតកម្ម ក្នុងស្រុកជាដើម។
លោកឧកញ៉ា បន្តថា ជុំវិញការវិនិយោគចំពោះរោងចក្រដែលប្រើប្រាស់វត្ថុធាតុដើម ចេញពីជ័រកៅស៊ូនេះ បើតាមក្រុមប្រឹក្សា អភិវឌ្ឍន៍កម្ពុជា យើងនឹងមានរោងចក្របង្កើតថ្មី ២ ទៅ ៣ក្រុមហ៊ុនទៀត បច្ចុប្បន្នក្រុមហ៊ុនទាំងនោះកំពុងសាងសង់ ដូច្នេះក្រោយពីសាងសង់រួច ក្រុមហ៊ុនទាំងនោះនឹងត្រូវការជ័រកៅស៊ូក្នុងស្រុកកាន់តែច្រើន សម្រាប់យកទៅបម្រើក្នុងខ្សែច្រវ៉ាក់ផលិតកម្ម ដែលជាផ្នែក មួយយ៉ាងសំខាន់ ព្រោះមិនត្រឹមតែជួយដល់កម្លាំងបម្រើក្នុងរោងចក្រ ឬកម្លាំងពលកម្មនៅក្នុងការដាំដុះជាដើមប៉ុណ្ណោះទេ គឺផ្តល់ឱកាសដល់ដៃគូរវិនិយោគផ្នែកកៅស៊ូ នឹងប្រជាពលរដ្ឋដែលជាអ្នកដាំដុះកៅស៊ូក្នុងស្រុក ដែលបានកំពុងរង់ចាំជាយូរមកហើយ។
ទាក់ទងកិច្ចដំណើររោងចក្រផលិតសំបកកង់នេះ ឯកឧត្ដម ហេង សុខគង់ រដ្ឋលេខាធិការក្រសួងឧស្សាហកម្ម បច្ចេកវិទ្យា វិទ្យាសាស្ត្រ និងនវានុវត្តន៍ ថ្លែងឲ្យដឹងថា នាពេលកន្លងមកនេះ កម្ពុជាទទួលបានរោងចក្រផលិតសំបកកង់រថយន្តគ្រប់ប្រទេសមាន ចំនួនពីរ ក្នុងនោះក្រុមហ៊ុន សាន់ដិន អិនដាសស្ទី (Sandien Industry) បើកដំណើរការនៅខេត្តកំពង់ស្ពឺ មានទុនវិនិយោគជិត ៣៣ លានដុល្លារអាមេរិក និងក្រុមហ៊ុន CART TIRE CO., LTD វិនិយោគនៅតំបន់សេដ្ឋកិច្ចពិសេសឈីលូបាវិត ខេត្តស្វាយរៀង មានទុនវិនិយោគ ប្រមាណ ១៥លានដុល្លារអាមេរិក ដែលក្រុមហ៊ុនមទាំងពីរកំពុងដំណើរការខ្សែច្រវ៉ាក់ផលិតកម្មប្រព្រឹត្តទៅដោយរលូន។
សូមបញ្ជាក់ថា៖ ជុំវិញការផលិតសំបកកង់រថយន្តរបស់ក្រុមហ៊ុនទាំងពីរ ក្នុងនោះនៅថ្ងៃទី១៨ ខែវិច្ឆិកា ឆ្នាំ២០២១ កន្លងមកនេះ ក្រុមហ៊ុន CART TIRE CO., LTD បានចាប់ផ្តើមអនុវត្តក្នុងខ្សែផលិតកម្មពេញលេញ ក្នុងការផលិតសំបកកង់រថយន្ត នៅក្នុងតំបន់សេដ្ឋកិច្ច ពិសេស ឈីលូបាវិត ក្នុងទឹកដីខេត្តស្វាយរៀង ក្នុងនោះ សម្រាប់ជំហានដំបូង ក្រុមហ៊ុនមួយនេះគ្រោងផលិត សំបកកង់រថយន្តចំនួនប្រមាណ ៥លានសំបកកង់ ក្នុងមួយឆ្នាំ និងកើនឡើងដល់ ៩លានសំបកកង់ថែមទៀត នៅក្នុងផែនការ បន្តបន្ទាប់ ដោយគ្រោងនាំចេញទៅកាន់ទីផ្សារ អាមេរិក និងអឺរ៉ុបជាដើម៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
