ទីភ្នាក់ងារសប្បុរសធម៌មកពីអារ៉ាប៊ីសាអ៊ូឌីត និងហ្ស៊កដានី កាលពីថ្ងៃចន្ទ បានចាប់ផ្តើមដំណាក់កាលចុងក្រោយនៃគម្រោងជំនួយស្បៀងអាហារដែលកំពុងបន្ត ដែលផ្តល់ជំនួយសម្រាប់មនុស្សរាប់ពាន់នាក់ នៅក្នុងប្រទេសហ្ស៊កដានី ក្នុងកិច្ចប្រឹងប្រែង ដើម្បីដោះស្រាយបញ្ហាប្រឈមផ្នែកសេដ្ឋកិច្ច និងជីវភាពរស់នៅដែលកំពុងកើនឡើង។

ទីភ្នាក់ងារព័ត៌មាន Jordan News បានរាយការណ៍ថា គំនិតផ្តួចផ្តើមដែលរៀបចំដោយទីភ្នាក់ងារជំនួយអារ៉ាប៊ីសាអ៊ូឌីត KSrelief សហការជាមួយអង្គការសប្បុរសធម៌ Jordan Hashemite ផ្តល់អត្ថប្រយោជន៍ដល់មនុស្សជាង ២៥.០០០នាក់ រួមទាំងជនភៀសខ្លួនស៊ីរី និងប៉ាឡេស្ទីន និងគ្រួសារហ្ស៊កដានីដែលងាយរងគ្រោះ។

អង្គការ JHCO កំពុងចែកចាយប័ណ្ណអាហារដល់ប្រជាជនរាប់ពាន់គ្រួសារ នៅក្នុងក្រុមដែលងាយរងគ្រោះ ក្នុងគោលបំណងកាត់បន្ថយបន្ទុកហិរញ្ញវត្ថុ និងជួយបំពេញតម្រូវការអាហារសំខាន់ៗរបស់ពួកគេ។ គម្រោងនេះ ដំណើរការតាមរយៈហាងដែលមានការទទួលស្គាល់ចំនួន ១០៣ នៅទូទាំងប្រទេស ដោយផ្តល់ឲ្យអ្នកទទួលផលនូវលទ្ធភាពទទួលបានអាហារសំខាន់ៗ ដែលមានតម្លៃទាប

ទីភ្នាក់ងារសារព័ត៌មាននេះ បានបញ្ជាក់ថា អ្នកទទួលផលបានសម្តែងការដឹងគុណចំពោះគំនិតផ្តួច       ផ្តើមនេះ ដោយពណ៌នាថាជា «ការអន្តរាគមន៍ទាន់ពេលវេលា» ដែលបានបំពេញតម្រូវការអាហារបន្ទាន់របស់ពួកគេ ចំពេលមានបញ្ហាប្រឈមនាពេលបច្ចុប្បន្ននេះ។