ប្រធានាធិបតីអ៊ុយក្រែន លោក Volodymyr Zelenskyy បាននិយាយថា លោក Vladimir Putin មិនបានត្រៀមខ្លួន សម្រាប់បទឈប់បាញ់នោះទេ ប៉ុន្តែកំពុងត្រៀមកងទ័ពរបស់លោក សម្រាប់ «ប្រតិបត្តិការវាយលុកថ្មី» នៅក្នុងប្រទេសអ៊ុយក្រែន ទោះបីជាមេដឹកនាំរុស្ស៊ីរូបនេះ គ្រោងនឹងជួបប្រធានាធិបតីអាមេរិក លោក Donald Trump សម្រាប់កិច្ចចរចាសន្តិភាពនៅរដ្ឋអាឡាស្កាក៏ដោយ។

លោក Zelenskyy បាននិយាយថា របាយការណ៍ពីចារកម្ម និងមេបញ្ជាការយោធារបស់អ៊ុយក្រែន បង្ហាញថា លោក Putin មានបំណងបង្ហាញកិច្ចប្រជុំរបស់លោកនៅថ្ងៃសុក្រជាមួយលោក Trump ថា ជា «ជ័យជម្នះផ្ទាល់ខ្លួន ហើយបន្ទាប់មកបន្តធ្វើសកម្មភាពដូចពីមុនដដែល» នៅក្នុងសង្រ្គាម លើប្រទេសអ៊ុយក្រែន។

នៅក្នុងសារវីដេអូមួយដែលត្រូវបានបង្ហោះលើគណនីបណ្ដាញសង្គមរបស់លោក កាលពីយប់ថ្ងៃចន្ទ (ទី១១ ខែសីហា) លោក Zelenskyy បានប្រាប់ថា៖ «គាត់ (លោក Putin) ពិតជាមិនបានរៀបចំ សម្រាប់បទឈប់បាញ់ ឬការបញ្ចប់សង្រ្គាមនោះទេ។ មិនមានការបង្ហាញពីអ្វី ដែលថា រុស្ស៊ីបានទទួលសញ្ញាត្រៀមខ្លួន សម្រាប់ស្ថានភាពក្រោយសង្គ្រាមឡើយ»។

លោកបានបន្ថែមថា៖ «ផ្ទុយទៅវិញ ពួកគេកំពុងដាក់ពង្រាយឡើងវិញនូវកងទ័ព និងកងកម្លាំងរបស់ពួកគេ តាមរបៀបដែលបង្ហាញពីការរៀបចំ សម្រាប់ប្រតិបត្តិការវាយលុកថ្មី។ ប្រសិនបើមាននរណាម្នាក់កំពុងរៀបចំ សម្រាប់សន្តិភាពនោះ សកម្មភាពនេះមិនមែនជាអ្វីដែលរូបគាត់ធ្វើនោះឡើយ»៕