យោងតាមប្រព័ន្ធផ្សព្វផ្សាយរដ្ឋបានឲ្យដឹងថា នគរបាលអ៊ីរ៉ង់បានចាប់ខ្លួនជនសង្ស័យចំនួន ២១.០០០នាក់ ក្នុងអំឡុងពេលមានសង្រ្គាមរយៈពេល ១២ថ្ងៃ ជាមួយអ៊ីស្រាអែល កាលពីខែមិថុនា។

បន្ទាប់ពីមានការវាយប្រហារតាមអាកាសរបស់អ៊ីស្រាអែល ដែលបានផ្ទុះឡើងនៅថ្ងៃទី១៣ ខែមិថុនា កងកម្លាំងសន្តិសុខអ៊ីរ៉ង់ បានចាប់ផ្តើមយុទ្ធនាការតាមចាប់ខ្លួនគ្រប់ច្រកល្ហក រួមជាមួយនឹងការបង្កើនវត្តមាននៅតាមដងផ្លូវ ជាពិសេសប៉ុស្តិ៍ត្រួតពិនិត្យ និង «ការរាយការណ៍សាធារណៈ» ដោយប្រជាពលរដ្ឋត្រូវបានអំពាវនាវឲ្យផ្ដល់របាយការណ៍ អំពីបុគ្គលណាម្នាក់ដែលពួកគេគិតថា កំពុងធ្វើសកម្មភាពគួរឲ្យសង្ស័យ។

អ្នកនាំពាក្យនគរបាល លោក Saeid Montazerolmahdi បាននិយាយថា «មានការកើនឡើងចំនួន ៤១ភាគរយនៃការហៅទូរសព្ទពីសាធារណជន ដែលនាំទៅដល់ការចាប់ខ្លួនជនសង្ស័យចំនួន ២១.០០០នាក់ ក្នុងអំឡុងពេលមានសង្រ្គាមរយៈពេល ១២ថ្ងៃនោះ»។ លោកមិនបានបញ្ជាក់ថា តើអ្នកដែលត្រូវបានចាប់ខ្លួន ត្រូវបានសង្ស័យអំពីអ្វីនោះឡើយ ប៉ុន្តែទីក្រុងតេអេរ៉ង់ បានឲ្យដឹងនៅមុននោះ អំពីការមានបុគ្គលបញ្ជូនព័ត៌មានដែលអាចជួយនាំទៅដល់ការវាយប្រហាររបស់អ៊ីស្រាអែល។

ជម្លោះអ៊ីស្រាអែល និងអ៊ីរ៉ង់ ក៏បាននាំឲ្យមានការបង្កើនល្បឿននិរទេសជនអន្ដោប្រវេសន៍អាហ្វហ្គានីស្ថានដែលត្រូវបានគេជឿថា រស់នៅដោយខុសច្បាប់ នៅក្នុងប្រទេសអ៊ីរ៉ង់ ហើយភ្នាក់ងារជំនួយរាយការណ៍ថា អាជ្ញាធរមូលដ្ឋាន ក៏បានចោទប្រកាន់ប្រជាជនអាហ្វហ្គានីស្ថានមួយចំនួនពីបទធ្វើចារកម្មឲ្យអ៊ីស្រាអែលផងដែរ៕