មន្ត្រីរដ្ឋាភិបាល នៅថ្ងៃអង្គារ (ទី១២ ខែសីហា) នេះ បានប្រាប់ឲ្យដឹងថា យ៉ាងហោចណាស់ទាហានប៉ាគីស្ថានចំនួន ៩នាក់ ត្រូវបានសម្លាប់ នៅពេលដែលក្រុមសកម្មប្រយុទ្ធរាប់សិបនាក់ បានបើកការវាយប្រហារនៅក្នុងខេត្ត Balochistan ភាគនិរតីនៃប្រទេសនេះ។

ការវាយប្រហារកាលពីថ្ងៃចន្ទ (ទី១១ ខែសីហា) បានកើតឡើងនៅថ្ងៃដដែលដែលក្រសួងការបរទេសសហរដ្ឋអាមេរិក បានចុះបញ្ជីកងទ័ពរំដោះ Baloch (BLA) ជាអង្គការភេរវករបរទេស បន្ទាប់ពីមានការវាយលុកបង្ហូរឈាមជាច្រើនដែលត្រូវបានអះអាងទទួលខុសត្រូវដោយក្រុមនេះ។

មន្ត្រីរដ្ឋាភិបាលជាន់ខ្ពស់នៃតំបន់ Washuk ជាកន្លែងដែលការវាយប្រហារបានកើតឡើង បានប្រាប់ថា ក្រុមសកម្មប្រយុទ្ធរាប់សិបនាក់ បានវាយប្រហារប៉ុស្តិ៍នគរបាល និងបរិវេណកងកម្លាំងព្រំដែន។

ដោយនិយាយក្នុងលក្ខខណ្ឌមិនបញ្ចេញឈ្មោះ មន្ត្រីរូបនេះបាននិយាយថា៖ «កងទ័ពត្រូវបានវាយប្រហារដោយភេរវករ នៅពេលពួកគេធ្វើដំណើរលើផ្លូវ ដើម្បីឆ្លើយតបនឹងស្ថានការណ៍។ ភេរវករបានសម្លាប់ទាហាន ៩នាក់»។

ចំណែកមន្ត្រីជាន់ខ្ពស់ម្នាក់ទៀតមកពីនាយកដ្ឋានផ្ទៃក្នុងខេត្តដែលសុំមិនបញ្ចេញឈ្មោះដែរ បានបញ្ជាក់ប្រាប់សារព័ត៌មានថា៖ «មានភេរវករចំនួនពី ៤០ ទៅ ៥០នាក់ ជិះម៉ូតូ ដែលបានវាយប្រហារអគាររដ្ឋបាល និងបានបំផ្លិចបំផ្លាញអគារនោះ»។ 

មន្ត្រីទាំង ២រូបនោះបានបន្ថែមទៀតថា ទាហាន ៦នាក់ផ្សេងទៀត ក៏រងរបួសផងដែរ នៅក្នុងការវាយប្រហារនេះ។ មិនទាន់មានក្រុមណាមួយចេញមកអះអាងទទួលខុសត្រូវ ជុំវិញការវាយប្រហារនេះទេ ប៉ុន្តែ BLA គឺជាក្រុមសកម្មបំផុត នៅក្នុងតំបន់នេះ៕