យុវតី Maha Ali ដែលជានិស្សិតមួយរូបនៅតំបន់ហ្កាហ្សា និយាយថា ការវាយប្រហាររបស់អ៊ីស្រាអែលលើដែនដីប៉ាឡេស្ទីន បានប្លន់យកការសិក្សារបស់ពួកគេ ។

ស្ថាប័នអប់រំ ធ្លាប់ផ្តល់ជាមាគ៌ាសម្រាប់អនាគតភ្លឺស្វាងដល់និស្សិតហ្កាហ្សា ប៉ុន្តែឥឡូវវាបានប្រែក្លាយជាទីជម្រកសម្រាប់ជនប៉ាឡេស្ទីនដូចជាយុវតី Ali ។

យុវតី Ali និយាយថា ក្នុងនាមជាយុវតីមួយរូប ពួកយើងចង់សិក្សា និងបន្តអនាគតរបស់ពួកយើង រស់រានដូចជាមនុស្សដទៃនៅបរទេសដែលអាចរស់នៅតាមជីវិតសាមញ្ញារបស់ពួកគេ ។ ឥឡូវពួកយើងរស់នៅទីនេះ បង្កាត់ភ្លើង ដឹកទឹក និងរស់នៅក្នុងជីវិតដែលអាចកាត់យល់បាន ។

យុវតី Ali គឺជានិស្សិតថ្នាក់អនុបណ្ឌិតដែលប្តេជ្ញាចិត្តក្លាយជាអ្នកសារព័ត៌មាន ប៉ុន្តែដូចគ្នានឹងនិស្សិតផ្សេងទៀតដែរ យុវតីរូបនេះមានមហិច្ឆិតាមួយគត់នាពេលឥឡូវនេះ គឺស្វែងរកអាហារ ពេលដែលភាពអត់ឃ្លានកើនឡើង ។

យុវតី Aliនិយាយថា បច្ចុប្បន្នពួកយើងគិតម្យ៉ាងគត់ពីវិធីសាស្រ្តស្វែងម៉្សៅធ្វើនំបុ័ង ឬវិធីស្វែងរកទឹកផឹក នេះគឺជារឿងម្យ៉ាងគិតដែលពួកយើងគិតនៅក្នុងសម័យសង្រ្គាម ។ ពួកយើងលែងគិតទៀតហើយពីវិធីដែលពួកយើងអាចធ្វើដំណើរទៅបរទេស ពីព្រោះថា ព្រំដែនបានបិទអស់ទៅហើយ ។ ពួកយើងគ្មានជម្រើសផ្សេងនោះទេ ប៉ុន្តែត្រូវរៀនរស់នៅក្នុងការសម្លាប់រង្គាលមួយនេះ ។

យោងតាមការវាយតម្លៃរបស់អង្គការសហប្រជាជាតិ(UN)កាលពីខែកក្កដា បានឲ្យដឹងថា ស្ថាប័នអប់រំហ្កាហ្សាប្រហែល ៩៧ភាគរយ រងការខូចខាត ក្នុងនោះ ៩១ភាគរយ ត្រូវការសាងសង់ឡើងវិញទាំងស្រុង ដើម្បីអាចដំណើរការម្តងទៀតបាន ។

រដ្ឋមន្រ្តីក្រសួងអប់រំប៉ាឡេស្ទីន បានចោទប្រកាន់អ៊ីស្រាអែលថា បានបំផ្លិចបំផ្លាញជាប្រព័ន្ធលើស្ថាប័នអប់រំ ៕