សមាជិកសភាបគណក្សភឿថៃ ជំរុញឱ្យតុលាការធម្មនុញ្ញពន្យារពេលចេញសេចក្ដីសម្រេច លើសំណុំរឿងលោកស្រី Paetongtarn ដែលត្រូវបានព្យួរពីតំណែង ស្របពេលមានវិបត្តិនយោបាយធ្ងន់ធ្ងរ ដោយបង្កើតឲ្យមានភាពទំនេរនៃអំណាចនិងអស្ថិរភាព ។គណបក្សនេះ ត្រៀមផែនការគាំទ្រ ខណៈសេចក្ដីសម្រេចរបស់តុលាការ គំរាមកំហែងដល់ការក្ដោបក្តាប់អំណាចរបស់គ្រួសារ Shinawatra ។

ប្រទេសថៃកំពុងស្ថិតនៅលើមាត់ជ្រោះនៃព្យុះនយោបាយ ព្រោះសេចក្តីសម្រេចរបស់តុលាការដ៏សំខាន់គំរាមកំហែងការផ្លាស់ប្ដូរដល់ការក្ដោបក្ដាប់អំណាចរបស់គ្រួសារ Shinawatra ។ កាលពីថ្ងៃអង្គារសប្ដាហ៍នេះ សមាជិកសភាគណបក្សភឿថៃ លោកបណ្ឌិត ឆឺតឆៃ ថាន់ធីស៊ីរិ (Cherdchai Tantisiri)បានទាមទារឱ្យតុលាការធម្មនុញ្ញពន្យារពេលក្នុងការចេញសាលក្រមរបស់ខ្លួនលើជោគវាសនារបស់នាយករដ្ឋមន្ត្រី លោកស្រី Paetongtarn Shinawatra ដែលត្រូវព្យួរតំណែង។

លោក ឆឺតឆៃ អំពាវនាវឱ្យពន្យារពេលលើសំណុំរឿងនាយករដ្ឋមន្ត្រីរយៈពេល៦ខែ ហើយងាកទៅផ្តោតលើវិបត្តិដែលកំពុងបន្តរួបរឹតប្រទេសនេះ។

សំណុំរឿងដែលគាំទ្រដោយព្រឹទ្ធសភាបានបង្ខំឱ្យផ្អាកតួនាទីរបស់លោកស្រី Paetongtarn រួចហើយ ដោយធ្វើឲ្យភាពទំនេរនៃអំណាចមិនច្បាស់លាស់។អស្ថិរភាពនេះកាន់តែហុចផលអាក្រក់ដល់ស្ថានការណ៍ព្រំដែនកាន់តែតានតឹងរួចទៅហើយជាមួយប្រទេសកម្ពុជា ក្រោយការប៉ះទង្គិចដ៏បង្ហូរឈាមរយៈពេល៤ថ្ងៃ និងបទឈប់បាញ់ដ៏ផុយស្រួយកាលពីថ្ងៃទី ២៨ ខែកក្កដា។ ពេលនេះប្រទេសថៃកំពុងប្រឈមនឹងវិបត្តិមួយទៀត។ជាថ្មីម្ដងទៀតគ្រួសារ Shinawatra ស្ថិតនៅចំណុចកណ្តាលនៃព្យុះនយោបាយរបស់ប្រទេសថៃ។ចន្លោះពេលនេះដល់ថ្ងៃទី ៩ ខែកញ្ញា សាលក្រមសំខាន់ៗចំនួនបីនឹងកំណត់ពីអនាគតនយោបាយរបស់ពួកគេ។គណបក្សភឿថៃ លើកឡើងថាការពន្យារពេលចេញចេក្ដីសម្រេចនេះ គឺជារឿងចាំបាច់ណាស់ ដោយសារតែប្រទេសនេះកំពុងប្រឈមនឹងស្ថានភាពលំបាក៕