កងទាហានអ៊ុយក្រែន ដែលត្រៀមលក្ខណៈប្រយុទ្ធគ្រប់ពេលនៅទីតាំងហ្វឹកហ្វឺន បាននិយាយថា ពួកគេមានជំនឿចិត្តតិចតួចណាស់លើការរំពឹងទុកសម្រាប់បទឈប់បាញ់ឆាប់រហ័ស ហើយកងកម្លាំងជាច្រើនបានច្រានចោលការលើកឡើងដែលថា ទីក្រុងគីវ គួរតែបោះបង់ចោលទឹកដីដែលវាយដណ្ដើមយកមកវិញបានដោយលំបាករបស់ខ្លួន ទៅឱ្យរុស្ស៊ី។

សារព័ត៌មានរ៉យទ័របានទៅសម្ភាសកងទ័ពនៅមូលដ្ឋានហ្វឹកហ្វឺនចំនួន ២កន្លែងនៅតំបន់ Kharkiv ភាគឦសានក្នុងសប្តាហ៍នេះ ដោយអ្នកទាំងនោះនៅតែមានមានចិត្តសង្ស័យលើការបញ្ឈប់ការប្រយុទ្ធដ៏ឆាប់រហ័សណាមួយ ហើយក៏បន្តបដិសេធមិនសម្បទានទឹកដីឡើយ ប៉ុន្មានថ្ងៃមុនកិច្ចប្រជុំដែលគ្រោងទុកនៅរដ្ឋអាឡាស្កា រវាងលោកប្រធានាធិបតីអាមេរិក Donald Trump និងសមភាគីរុស្ស៊ី លោក Vladimir Putin។

មេបញ្ជាការម្នាក់នៃមូលដ្ឋានហ្វឹកហ្វឺនអ៊ុយក្រែន បានប្រាប់កិច្ចសម្ភាសន៍រ៉យទ័រដោយចោទជាសំណួរថា៖ "ប្រគល់ទឹកដីឱ្យអ្នកណា? ប្រគល់ដើម្បីអ្វី?"។ ទាហានម្នាក់នៅអង្គភាពលេខ៥៨ របស់អ៊ុយក្រែនបាននិយាយថា៖ "គ្រប់មាគ៌ាឆ្ពោះទៅរកសន្តិភាពគឺត្រូវកសាងឡើងតាមរយៈកិច្ចចរចា ប៉ុន្តែមិនគិតឡើយថាថ្ងៃស្អែកនឹងមានសន្តិភាពភ្លាមនោះ ពីព្រោះខ្មាំងនៅតែបន្តរុលចូលរហូត"។

ក្រុមហ្វឹកហ្វឺនក្នុងកងទ័ពអ៊ុយក្រែនផ្សេងទៀតនៅតំបន់ Kharkiv ក៏បានប្រាប់កិច្ចសម្ភាសន៍រ៉យទ័រថា ពួកគេស្វាគមន៍បទឈប់បាញ់ណាស់ ប៉ុន្តែនិយាយថា វិមានក្រឹមឡាំង ប្រហែលនឹងត្រូវតែបង្ខំឱ្យបង្កើតសន្តិភាព។ អ៊ុយក្រែនបារម្ភថា មេដឹកនាំអាំមេរិក-រុស្ស៊ី អាចប្រើប្រាស់កិច្ចប្រជុំកំពូលរបស់ពួកគេនៅថ្ងៃសុក្រសប្ដាហ៍នេះ ដើម្បីកំណត់លក្ខខណ្ឌសន្តិភាព និងបង្ខំទីក្រុងគីវ ឱ្យបោះបង់ចោលទឹកដី ជាអ្វីដែលប្រធានាធិបតីអ៊ុយក្រែន លោក Volodymyr Zelenskiy បានច្រានចោលទាំងស្រុង៕