កូរ៉េខាងជើង៖ កូរ៉េខាងជើងបាននិយាយនៅថ្ងៃអង្គារនេះថា ខ្លួនបានបាញ់មីស៊ីលយុទ្ធសាស្ត្រប្រើទូរបញ្ជាចំនួន ២គ្រាប់កាលពីមួយថ្ងៃមុនដើម្បីផ្ទៀងផ្ទាត់ភាពជាក់លាក់នៃប្រព័ន្ធអាវុធនោះ។ ការបាញ់កាលពីថ្ងៃចន្ទដែលកូរ៉េខាងត្បូងបានហៅថា ជាមីស៊ីលបាលីស្ទីករយៈចម្ងាយខ្លីគឺជាអាវុធទី៤ របស់កូរ៉េខាងជើងដែលបានសាកល្បងនៅក្នុងខែនេះ ខណៈដែលទីក្រុងព្យុងយ៉ាងបញ្ចេញសាច់ដុំយោធារបស់ខ្លួន ស្របពេលមិនអើពើនឹងសំណើសុំជួបចរចាពីសហរដ្ឋអាមេរិក។
ទោះបីជារងទណ្ឌកម្មពីអន្តរជាតិយ៉ាងណាក្ដី ទីក្រុងព្យុងយ៉ាងបានបាញ់សាកល្បងអាវុធជាបន្តបន្ទាប់នៅឆ្នាំនេះ រួមទាំងមីស៊ីលល្បឿនលឿនជាងសំឡេង ខណៈមេដឹកនាំ Kim Jong Un ព្យាយាមពង្រឹងវិស័យយោធាឲ្យដល់គោលដៅរបស់លោក។ ខណៈព្យាយាមទប់ផ្នែកសេដ្ឋកិច្ចដែលរងផលប៉ះពាល់ពីការបិទប្រទេសដោយខ្លួនឯងទប់ស្កាត់ការឆ្លងវីរុសកូរ៉ូណា ប្រទេសកូរ៉េខាងជើងដែលក្រីក្រមិនបានឆ្លើយតបទៅនឹងសំណើសុំជួបពិភាក្សាពីសំណាក់ទីក្រុងវ៉ាស៊ីនតោនទេ ខណៈបង្កើនការសាកល្បងអាវុធទ្វេដង និងប្តេជ្ញាថានឹងឆ្លើយតបកាន់តែខ្លាំង និងជាក់លាក់ទៅនឹងការប៉ុនប៉ងណាមួយមកលើខ្លួន។ ការបាញ់នេះធ្វើឡើងក្នុងពេលវេលាដ៏រសើបមួយនៅក្នុងតំបន់ ដោយប្រទេសចិនដែលជាសម្ព័ន្ធមិត្តដ៏សំខាន់តែមួយគត់របស់កូរ៉េខាងជើង នឹងរៀបចំធ្វើជាម្ចាស់ផ្ទះកីឡាអូឡាំពិករដូវរងានៅខែក្រោយ ហើយកូរ៉េខាងត្បូងនឹងរៀបចំការបោះឆ្នោតប្រធានាធិបតីនៅខែមីនា៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
