សហរដ្ឋអាមេរិក បានដាក់ទណ្ឌកម្មលើក្រុមប្រដាប់អាវុធមួយក្រុមដែលត្រូវបានចោទប្រកាន់ពីបទជីករ៉ែខុសច្បាប់នៅក្នុងសាធារណរដ្ឋប្រជាធិបតេយ្យកុងហ្គោ ខណៈទាំងកងទ័ពនិងក្រុមឧទ្ទាម M23 គាំទ្រដោយប្រទេសរ៉្វាន់ដា បានចោទប្រកាន់គ្នាទៅវិញទៅមកពីការរំលោភលើកិច្ចព្រមព្រៀងបទឈប់បាញ់ សម្របសម្រួលដោយសហរដ្ឋអាមេរិកដែលបានឈានដល់កាលពីពេលថ្មីៗនេះ ដោយមានការវាយប្រហារទីតាំងរបស់គ្នាទៅវិញទៅមក។

ក្រសួងរតនាគារសហរដ្ឋអាមេរិក បាននិយាយកាលពីថ្ងៃអង្គារថា ក្រសួងកំពុងរារាំងផលប្រយោជន៍ទាំងអស់ និងរឹតបន្តឹងប្រតិបត្តិការជាមួយក្រុម Pareco-FF ជាក្រុមប្រដាប់អាវុធដែលខ្លួនបាននិយាយថា បានគ្រប់គ្រងទីតាំងជីករ៉ែ coltan ដ៏សំខាន់នៅតំបន់ Rubaya ពីឆ្នាំ២០២២ដល់ឆ្នាំ២០២៤ ហើយបានប្រឆាំងនឹងក្រុមM23។ រដ្ឋបាលរបស់ប្រធានាធិបតី លោក Donald Trump បាននឹងកំពុងជំរុញឱ្យសហរដ្ឋអាមេរិកអាចចូលដំណើរការរ៉ែក្នុងតំបន់នេះ ដូចដែលខ្លួនបានធ្វើនៅក្នុងតំបន់ផ្សេងទៀតនៃពិភពលោក រួមទាំងនៅប្រទេសអ៊ុយក្រែនផងដែរ។

រដ្ឋបាលនេះក៏បានដាក់ទណ្ឌកម្មលើក្រុមហ៊ុនរុករករ៉ែកុងហ្គោ CDMC ដោយនិយាយថាក្រុមហ៊ុនបានលក់រ៉ែដែលមានប្រភពនិងរត់ពន្ធពីអណ្តូងរ៉ែនៅជិតតំបន់ Rubaya និងក្រុមហ៊ុននាំចេញមានមូលដ្ឋាននៅទីក្រុងហុងកុងចំនួនពីរគឺក្រុមហ៊ុន East Rise និងក្រុមហ៊ុន Star Dragon ដែលត្រូវបានចោទប្រកាន់ពីបទទិញរ៉ែពីក្រុមប្រដាប់អាវុធ។ អ្នកនាំពាក្យក្រសួងការបរទេសអាមេរិក លោកស្រី Tammy Bruce បាននិយាយនៅក្នុងសេចក្តីថ្លែងការណ៍ថា «សហរដ្ឋអាមេរិក កំពុងផ្ញើសារយ៉ាងច្បាស់ថា គ្មានក្រុមប្រដាប់អាវុធ ឬអង្គភាពពាណិជ្ជកម្មណាមួយ អាចទ្របាននឹងទណ្ឌកម្មទេ ប្រសិនបើពួកគេធ្វើឲ្យអន្តរាយដល់សន្តិភាព ស្ថិរភាព ឬសន្តិសុខនៅក្នុងប្រទេសកុងហ្គោ»។ បច្ចុប្បន្នតំបន់ Rubaya ស្ថិតក្រោមការគ្រប់គ្រងរបស់ក្រុម M23 ដែលសហរដ្ឋអាមេរិកបានដាក់ទណ្ឌកម្មរួចហើយ។ អណ្តូងរ៉ែនៅទីនោះផលិតពី១៥ ទៅ៣០ភាគរយនៃការផ្គត់ផ្គង់របស់ពិភពលោកនៃរ៉ែ coltan ជាសារធាតុរ៉ែដែលប្រើសម្រាប់គ្រឿងអេឡិចត្រូនិកដូចជាកុំព្យូទ័រយួរដៃ និងទូរស័ព្ទចល័តជាដើម។