យោងតាមប្រព័ន្ធផ្សព្វផ្សាយរដ្ឋដែលដកស្រង់សម្តីអ្នកនាំពាក្យអនុវត្តច្បាប់បានឱ្យដឹងថា នគរបាលរបស់អ៊ីរ៉ង់បានចាប់ខ្លួនជនសង្ស័យចំនួន២១.០០០នាក់ក្នុងអំឡុងពេលជម្លោះរយៈពេល១២ថ្ងៃរបស់ប្រទេសជាមួយអ៊ីស្រាអែល កាលពីក្នុងខែមិថុនា។

បន្ទាប់ពីការវាយប្រហារតាមអាកាសទ្រង់ទ្រាយធំរបស់អ៊ីស្រាអែល ចាប់ផ្តើមនៅថ្ងៃទី១៣ ខែមិថុនា ដែលបានសម្លាប់មន្ត្រីយោធាជាន់ខ្ពស់ និងអ្នកវិទ្យាសាស្ត្រ ព្រមទាំងជនស៊ីវិលរាប់រយនាក់ កងកម្លាំងសន្តិសុខអ៊ីរ៉ង់ បានចាប់ផ្តើមយុទ្ធនាការនៃការចាប់ខ្លួនដ៏ទូលំទូលាយ អមដោយការបង្កើនវត្តមាននៅតាមដងផ្លូវដោយដាក់មូលដ្ឋានប៉ុស្តិ៍ត្រួតពិនិត្យ និង «ការរាយការណ៍ជាសាធារណៈ»។ សហរដ្ឋអាមេរិក ក៏បានធ្វើការវាយប្រហារលើទីតាំងនុយក្លេអ៊ែរអ៊ីរ៉ង់ក្នុងអំឡុងពេលជម្លោះក្នុងនាមអ៊ីស្រាអែល។

ពលរដ្ឋអ៊ីរ៉ង់ ត្រូវបានអំពាវនាវឱ្យរាយការណ៍អំពីបុគ្គលណាម្នាក់ដែលពួកគេគិតថាកំពុងធ្វើសកម្មភាពគួរឱ្យសង្ស័យ។ អ្នកនាំពាក្យនគរបាលលោក Saeid Montazerolmahdi បាននិយាយថា «មានការកើនឡើងចំនួន៤១ភាគរយនៃការហៅទូរស័ព្ទពីសាធារណជន ដែលនាំឱ្យមានការចាប់ខ្លួនជនសង្ស័យចំនួន ២១.០០០នាក់ក្នុងអំឡុងពេលសង្រ្គាមរយៈពេល១២ថ្ងៃ»។

លោកពុំបាននិយាយថាអ្នកដែលត្រូវបានចាប់ខ្លួនត្រូវបានសង្ស័យអំពីអ្វីនោះទេ ប៉ុន្តែទីក្រុងតេអេរ៉ង់ បាននិយាយកាលពីពេលមុនពីអ្នកបញ្ជូនព័ត៌មានដែលអាចបានជួយនាំឲ្យមានការវាយប្រហារពីអ៊ីស្រាអែល។ តាំងពីចុងខែមិថុនាមក អ៊ីរ៉ង់បានកាត់ទោសមនុស្ស៧នាក់ពីបទធ្វើចារកម្មឱ្យអ៊ីស្រាអែល។ ជម្លោះអ៊ីស្រាអែល-អាមេរិក-អ៊ីរ៉ង់ បាននាំឱ្យមានល្បឿននៃការនិរទេសជនភៀសខ្លួនអាហ្វហ្គានីស្ថាន និងជនអន្តោប្រវេសន៍ដែលត្រូវបានគេជឿថាខុសច្បាប់នៅក្នុងប្រទេសអ៊ីរ៉ង់ ដោយទីភ្នាក់ងារជំនួយរាយការណ៍ថា អាជ្ញាធរក្នុងតំបន់បានចោទប្រកាន់ជនជាតិអាហ្វហ្គានីស្ថានមួយចំនួនពីបទធ្វើចារកម្មឲ្យអ៊ីស្រាអែល។